Сар о Соломоно кандэлас лэ Иеговас, андо Израилё сас мирно. Но во ля пала пэстэ бут манушнян анда авэр народоря, савэ тэлёнас хохавнэ дэвлэнди. Прожыля время и во паруделяпэ. Во кадяжэ ля тэ тэлёл хохавнэ дэвлэнди. Лэ Иеговасти када фартэ на чалеля. Во ԥэндя: «Мэ залава тутар о царство и розделисарава лэс пэ дуй царства. Май бут мэ дава тирэ слуӷости, ай май набут кодэлэнди, ко тутар жала».

О Иегова сыкадя, со камэл тэ стерэл. Еқвар па дром жалас лэ Соломоноско слуӷо о Иеровоамо и котэ диқляпэ лэ пророкоса, савэс ақарэнас Ахия. О пророко росшындя пэсти йда пэ 12 котора и ԥэндя лэ Иеровоамости: «О Иегова залэла о царство лэ Соломоностар и розделия лэс пэ дуй царства. Лэ пэсти дэш. Ту котэ авэса царё». О Соломоно уӷангля када и закамля тэ умарэл лэ Иеровоамос! Но во унашлятар андо Египто. Кала о Соломоно муля, ля тэ правий лэско шаво Ровоамо. Тоди о Иеровоамо поля, кай может тэ рийпэ андо Израилё и лэс котэ на умарэна.

Израильски барэдэра ԥэндэ лэ Ровоамости: «Драго обжапэ лэ манушэнца, тоди вонэ кандэна тут». Но лэстирэ  тэрнэ друӷоря подԥэндэ кадя: «На трэбуй лэн тэ жалуис! Тер кадя, кай лэндири бути тэ авэл инке май ԥари!» О Ровоамо кангля лэн. Во фартэ найдраго обжаласпэ лэ манушэнца и вонэ вазглэпэ. Вонэ стодэ лэ Иеровоамос тэ правий племенами, савэн сас дэш. Пэ кадэва царство линэ тэ ԥэнэн Израилё. Ай дуй авэр племя ашэлэпэ лэ Ровоамоса. Пэр лэндэ линэ тэ ԥэнэн лэ Иудаско царство. Акана 12 израильски племена сас розделимэ пэ дуй царства.

О Иеровоамо на камэлас, кай лэстирэ мануша тэ тэлён лэ Иеговасти андо Иерусалимо. Васо? Котэ правияс о Ровоамо. Во даралас, кай и мануша закамэна тэ ринпэ лэстэ. Важ када во стердя дуен сомнаконэн гуруворэн и ԥэндя: «О Иерусалимо фартэ дур. Тэлён лэ Дэвлэсти катэ». О народо ля тэ тэлёл сомнаконэ гуруворэнди и парашэля тэ тэлёл лэ Иеговасти.