Selemooni Yihowa magansiˈranni noo yannara, Israeelete daga salaametenni heedhino. Ikkollana Selemooni wole gobbanni kaphu maganna magansiˈrannoha duucha meento adhi. Kuni meenti, Selemooni yannate gedensaanni kaphu maganna magansiˈranno gede assino. Tennera Yihowa lowo geeshsha hanqino. Isi Selemoonira togo yii: ‘Israeelete gashshoote atewiinni haaˈre lamewa beeheemmo. Rooriidi gashshoote soqqamaanokki giddo mittoho eemmo; ate gaˈrera shiimiidi gashshoote calla eemmo.’

Yihowa hedinore wolu garinnino xawisino. Mitto barra Iyorbiaami yinannihu Selemooni soqqamaanchi doogote haˈranni heeˈre, Akiya yinanni masaalaanchinni xaadi. Akiya uddiˈrino uddano tonaalamewa daddare Iyorbiaamira togo yii: ‘Yihowa Israeelete gashshoote Selemooni mininni haaˈre lamewa beehino. Tonne gaˈre gashshattohu ate ikkootto daafira, konne tonne hocco adhi.’ Moote Selemooni tenne macciishshiti Iyorbiaami shaara hasi! Konni daafira Iyorbiaami Gibitsete gobba xooqi. Yannate gedensaanni, Selemooni reyita beettisi Roobiaami moote ikkino. Selemooni reyino daafira Iyorbiaami Israeelete gobba higi.

 Israeelete geerri Roobiaami, ‘Konni mannira danchare assittoro, insano hajajantannohe’ yitusi. Darawosi kayinni togo yite amaaltusi: ‘Manna gadadisi. Annikkinni roore lowo duha duhisiisi!’ Roobiaami darawosi yitinosire macciishshi. Isi manna lowo geeshsha gadadisino; mannuno isira hajajama giwi. Hakkiinni mannu Iyorbiaami tonne gaˈre moote assi; tonnenti gaˈre Israeelete gashshoote yinannita ikkitu. Wole lame gaˈre kayinni Yihudu gashshoote ikkitino; insa Roobiaamira haˈlitino. Konni garinni Israeelenniti 12 gaˈre beehantino.

Iyorbiaami mannisi Magano magansiˈrate Yerusaalame haˈrara dihasiˈrino; Yerusaalame noohu Roobiaami gashshooti giddooti. Isi mannu hakka haˈrara hasiˈrinokkihu mayiraatiro afootto? Iyorbiaami mannu hakka haˈriro anera agure Roobiaamira haˈlanno yee hedino. Konni daafira isi lame siittu misile culkunni seekke manna togo yii: ‘Yerusaalame lowo geeshsha xeertote. Konni daafira kowiicho magansidhe.’ Hakkiinni mannu culkunni seekkinoonni siitta magansiˈranni Yihowa hawi.