Su tempong i Salomo masatia si Yehuwa, tau Israel něbiahẹ̌ su pẹ̌darame. Katewe i Salomo nẹ̌kawing dingangu lawọ wawine bọu bangsa wal᷊inẹ, kụ i sire ene měnẹ̌němbah berhala. Kakạděngụe i Salomo nẹ̌bal᷊ui, kụ i sie timol᷊e něněmbah berhala. Yehuwa nẹ̌pědu. I Sie nẹ̌bera si Salomo, ’Kararatuangu Israel sarung al᷊ạkeng bọu kěluarganu kụ pahiạkeng makoạ darua. Iạ sarung měgělị bageang kaguwạkenge su sěngkatau ělangu, kụ kěluarganu kětạeng mẹ̌parenta su bageang limembong kadodọ.’

Yehuwa lai něpakẹ cara wal᷊inẹ gunang měhabarẹ̌ putusang’E. Sěngkatau ělang i Salomo, Yeroboam, nẹ̌sombang dingangi Nabi Ahiya su ral᷊eng. Ahiya něnggědẹ pakeange nakoạ 12 bageang kụ nẹ̌bera si Yeroboam, ’Yehuwa sarung měngal᷊ạ kararatuangu Israel bọu kěluargang i Salomo kụ měmahiạ ene makoạ darua. Al᷊ạ mapul᷊o bageang ini ual᷊ingu i kau sarung makoạ datu su mapul᷊o suku.’ Nakaringihẹ̌ hal᷊ẹ̌ ene, Datu Salomo mapulu měmate si Yeroboam! Hakị u ene, i sie timal᷊ang sarang Misire. Bọu ene, i Salomo nate, kụ i Rehoboam, anạe, nakoa datu. I Yeroboam apidu nẹ̌bal᷊ị sarang Israel ual᷊ingu nakapěndang seng aman.

 Maghaghurang su Israel nẹ̌bera si Rehoboam, mạeng i kau mapia su taumata, i sire sarung masatia si kau.’ Katewe manga hapị i Rehoboam apang mangudạ naul᷊ị, ’I kau pakatěgasẹ̌! Oro i sire pěhal᷊ẹ̌ pakarading!’ Rehoboam timol᷊e bawerang manga hapịe. I sie matingkaị su tau Israel. Hakị u ene i sire bọu mapul᷊o suku limawang. I sire něhengkẹ si Yeroboam nakoạ datung i sire, kụ mapul᷊o suku ene nisěbạ kararatuang Israel. Darua suku lěmbene nisěbạ kararatuang Yehuda, kụ i sire tatapẹ̌ masatia si Rehoboam. Su tempo ene, 12 suku Israel napahiạ.

Yeroboam madiri rakyate měngibadah su Yerusalem, wilayah kararatuang i Rehoboam. I kau masingkạ kawe kerene? Yeroboam matakụ i sire seng tawe masatia si sie kụ měmile si Rehoboam. Hakị u ene, i sie někoạ darua anạu sapi bọu wul᷊aeng kụ naul᷊ị, ’Yerusalem tumanịu marau. I kamene pěngibadạe sini.’ I sire něnětạ naněmbah anạu sapi ene kụ saụ niwul᷊e si Yehuwa.