Durante Salomão laran-metin ba Jeová, ema Izraél moris ho dame. Maibé Salomão kaben ho feto barak husi nasaun seluk neʼebé adora maromak falsu. Neineik-neineik Salomão nia hahalok troka, no nia mós komesa adora maromak falsu sira. Jeová sai hirus no hatete ba Salomão: ‘Haʼu sei hasai Izraél nia ukun husi ó-nia família no fahe ba rua. Haʼu sei fó parte boot liu ba ó-nia atan ida, no ó-nia família sei hetan deʼit parte kiʼik.’

Jeová uza dalan seluk tan atu fó sai ninia desizaun. Bainhira Salomão nia atan ida naran Jeroboão laʼo iha dalan, nia hasoru profeta Ahias. Ahias lees ninia roupa ba pedasuk 12 no hatete ba Jeroboão: ‘Jeová sei hasai Izraél nia ukun husi Salomão nia família no fahe ba parte rua. Foti pedasuk sanulu neʼe tanba ó sei sai liurai ba suku sanulu.’ Kuandu Salomão rona kona-ba neʼe, nia hakarak oho Jeroboão! Tan neʼe, Jeroboão halai ba Ejitu. Ikusmai Salomão mate, no ninia oan Roboão mak sai liurai. Jeroboão fila fali ba Izraél tanba seguru ona.

 Katuas sira iha Izraél hatete ba Roboão: ‘Se Ita-Boot hatudu laran-diʼak ba povu, sira sei laran-metin ba Ita-Boot.’ Maibé Roboão nia belun joven sira hatete ba nia: ‘Ó tenke siʼak! Haruka sira serbisu makaʼas liután!’ Roboão halo tuir joven sira-nia konsellu. Nia hatudu hahalok aat ba ema Izraél, tan neʼe suku sanulu kontra nia no foti Jeroboão sai sira-nia liurai, maibé suku rua kontinua laran-metin ba Roboão. Hanesan neʼe mak Izraél nia suku 12 fahe ba rua. Suku sanulu sai nasaun Izraél no suku rua sai nasaun Judá.

Jeroboão lakohi ninia povu atu bá adora Jeová iha templu iha Jeruzalein, neʼebé iha Roboão nia área. Ó hatene tanbasá? Jeroboão taʼuk katak sira sei la laran-metin ba nia no apoia Roboão. Tan neʼe, nia halo estátua karau-oan rua neʼebé halo husi osan-mean no hatete: ‘Jeruzalein dook tebes. Imi bele halo adorasaun iha neʼe.’ Povu komesa adora estátua karau-oan no haluha Jeová.