Nisambatse o Israelitao tamy ty Solomona mbe nanompo i Jehovah. Nanompo sampy ty Solomona, naho fa nanambaly ampela hafa firenena mpanompo sampy. Nahavignetse i Jehovah zay, le hoe reke tamy i Solomona: ‘Hafahagne ama’o naho amy ty ana’o ty fanjakà o Israelio, le hozaraeko roe. Faritse kedekede avao ty homeiko ty ana’o fa ze sisa’e homeiko ty mpanompo’o.’

Ino ty raha niseho? Nifanalaka tamy i Ahia mpaminany ty Jeroboama mpanompo i Solomona tie indraike. Zinara i Ahia 12 i akanjo’ey, le hoe reke tamy i Jeroboama: ‘Hafaha i Jehovah amy i Solomona naho amy ty ana’e ty fanjakà o Israelitao, le hozarae’e roe. Mangalà folo amy toa rehe, fa ihe ty hanjaka amy ty foko folo.’ Naho fa nirey i Solomona zay, le teà’e ho vinono ty Jeroboama faie nilay Ejipta agne. Nimate ty Solomona tafara atoy, le i Rehoboama ana’e ty nandimbe aze. Niheregne ta Israely agne amy izay ty Jeroboama.

Hoe o androanavi-pagnahy o Israelio tamy i Rehoboama: ‘Naho hai’o ty minday o vahoakeo, le tsy hivalike ama’o  iareo.’ Faie hoe ty nama i Rehoboama tama’e: ‘Ampiasao mafe iareo vande’e zay.’ Ty heve o tanora ragne’eo ty norihe i Rehoboama. Nanohetse aze o vahoakeo, le nizara roe i fanjakagney. I Jeroboama ty natao iareo mpanjaka ty foko folo, fa i Rehoboama ty mpanjaka ty foko roe ambi’e, ndra ty foko i Joda.

Tsy teà i Jeroboama hivavake a Jerosalema agne o vahoa’eo, satria fanjakà i Rehoboama ty agne. Nieretseretse reke fa manjare hanohagne i Rehoboama iareo naho mbeo. Namboatse agnombe volamena reke, le nirehake tamo o vahoakeo tie: ‘Lavitse loatse ty Jerosalema fa ndraleo’areo mivavake eto avao.’ Nagnaligno i Jehovah o vahoakeo naho fa nivavake tamy i agnombe volamenay.