Go ne go na le kagiso mo Iseraele fa Solomone a sa ntse a obamela Jehofa. Mme Solomone o ne a nyala basadi ba le bantsi ba ba tswang kwa mafelong a a farologaneng mme basadi bao ba ne ba sa obamele Jehofa. Ka iketlo, Solomone o ne a fetoga mme le ene a simolola go obamela medimo eo. Jehofa o ne a galefa. O ne a raya Solomone a re: ‘Bogosi bo tla tsewa mo losikeng lwa gago mme bo tla kgaoganngwa ka dikarolo tse pedi. Ke tla naya mongwe wa batlhanka ba gago karolo e kgolo mme lelapa la gago le tla busa karolo e nnye.’

Jehofa o ne a dira sengwe gape go bontsha gore se a se buileng se tla direga. Mongwe wa batlhanka ba ga Solomone e bong Jeroboame o ne a kopana le moporofeti Ahija mo tseleng. Ahija o ne a gagola seaparo sa gagwe ka dikarolo di le 12 mme a raya Jeroboame a re: ‘Jehofa o tla tsaya bogosi jwa Iseraele mo losikeng lwa ga Solomone a bo a bo kgaoganya ka dikarolo tse pedi. Tsaya dikarolo di le lesome tsa sone ka gonne o tla nna kgosi ya ditso di le lesome.’ Kgosi Solomone o ne a utlwela ka seo mme a batla go bolaya Jeroboame. Ka jalo, Jeroboame o ne a tshabela kwa Egepeto. Fa nako e ntse e ya, Solomone o ne a tlhokafala mme ngwana wa gagwe wa mosimane e bong Rehoboame o ne a nna kgosi. Jeroboame o ne a boela kwa Iseraele.

 Banna ba bagolo ba Iseraele ba ne ba raya Rehoboame ba re: ‘Fa o ka dirisana le batho sentle, ga ba kitla ba go tlhanogela.’ Mme ditsala tsa gagwe tsone di ne di mo raya di re: ‘O tshwanetse go tshwara batho setlhogo! Ba berekise thata!’ Rehoboame o ne a reetsa ditsala tsa gagwe. O ne a tshwara batho setlhogo, ka jalo, ba ne ba mo tlhanogela. Ba ne ba tlhoma Jeroboame gore e nne kgosi ya ditso di le lesome, tse di bidiwang bogosi jwa Iseraele. Ditso tse dingwe tse pedi di ne tsa bidiwa bogosi jwa Juda mme Rehoboame e ne ya nna kgosi ya tsone. Jaanong ditso tse 12 tsa Iseraele di ne di kgaogane.

Jeroboame o ne a sa batle gore batho ba gagwe ba ye go obamela kwa Jerusalema ka gonne Rehoboame e ne e le kgosi ya koo. A o itse gore goreng a ne a sa batle? Jeroboame o ne a tshaba gore ba tla mo tlhanogela ba bo ba reetsa Rehoboame. Ka jalo, o ne a dira dinamane tse pedi tsa gauta a bo a raya batho a re: ‘Jerusalema e kgakala thata. Lo ka obamela Modimo fano.’ Batho ba ne ba simolola go obamela dinamane tseo ba bo ba lebala Jehofa gape.