Pa nyengu yo Solomoni wasopanga Yehova, Ayisraele ajanga mwachimangu. Solomoni wanguto anthukazi anandi akutuliya muvyaru vinyaki wo asopanga achiuta aboza. Kamana ndi kamana, Solomoni wangusintha ndipu nayu wangwamba kusopa achiuta aboza. Yehova wangukwiya ndipu wangukambiya Solomoni kuti: ‘Yisraele watuzgikengeku ku banja laku ndipu wagaŵikengi paŵi. Chigaŵa chikulu ndichiperekengi ku yumoza wa ateŵeti ŵaku ndipu banja laku lilamuliyengi chigaŵa chimana.’

Yehova wangugwirisiya so ntchitu mchimi Ahija kuti walongo vo wakhumbanga kuchita. Yeroboamu, yumoza wa ateŵeti aku Solomoni wayendanga mumsewu ndipu wangukumana ndi mchimi Ahija. Iyu wangukeruwa chakuvwala chaki vigaŵa 12 ndipu wangukambiya Yeroboamu kuti: ‘Yehova watuzgengeku ufumu wa Yisraele ku banja laku Solomoni ndipu wawugaŵengi paŵi. Uto vigaŵa 10 ivi chifukwa ujengi fumu ya mafuku 10.’ Fumu Solomoni yinguvwa vo vinguchitika ndipu yakhumbanga kubaya Yeroboamu! Mwaviyo, Yeroboamu wanguthaŵiya ku Egipiti. Pati pajumpha nyengu Solomoni wangufwa ndipu mwana waki Rehoboamu wangwamba kulamuliya. Mwaviyo, Yeroboamu wanguwona kuti wawere ku Yisraele chifukwa watingi wakabayikengi cha.

 Ŵara ŵa Yisraele angukambiya Rehoboamu kuti: ‘Asani ŵanthu yaŵa uchitengi nawu vinthu umampha, ajengi akugomezeka kwaku yiwi.’ Kweni anyaki aku Rehoboamu angukamba kuti: ‘Ukhumbika kuŵasuzga ŵanthu yaŵa! Uŵagwirisengi ntchitu zinandi!’ Rehoboamu wangulondo ulongozgi wa anyamata wo wachezanga nawu. Iyu waŵachitiyanga nkhaza ŵanthu ndipu mafuku 10 nga Ayisraele ngangumugalukiya. Yiwu angusankha Yeroboamu kuja fumu ya mafuku 10 ngo ngaziŵikanga kuti, ufumu wa Yisraele. Mafuku nganyaki ngaŵi ngaziŵikanga kuti, ufumu wa Yuda ndipu ngangulutiriza kuja ngakugomezeka kwaku Rehoboamu. Umu ndimu mafuku 12 nga Yisraele ngangugaŵikiya.

Yeroboamu wakhumbanga cha kuti ŵanthu ŵaki alutengi ku Yerusalemu kuchisopa Yehova chifukwa ndiku Rehoboamu walamuliyanga. Utichiziŵa chifukwa chaki? Yeroboamu wawopanga kuti ŵanthu ŵaki amuthaŵengi ndipu alondongi Rehoboamu. Mwaviyo, wangupanga vikozgu viŵi va ŵana a ng’ombi a golidi ndipu wangukambiya ŵanthu kuti: ‘Ku Yerusalemu nkhutali. Mungasope kwenikunu.’ Ŵanthu wo anguleka so kusopa Yehova ndipu angwamba kusopa ŵana a ng’ombi agolidi.