Tepo Solomoni a nga ba a khozeya Jehovha, gu diri ni gurula Israyeli. Ganiolu, Solomoni a di dzega vanyamayi nya vangi nya mambe mayigo. Vanyamayi vovo va di gu khozeya sifananiso. Solomoni a di pheya gu vbindrugedza vbadugwana-vbadugwana, anuye a pheya gu khozeya sifananiso. Jehovha a di goroga ngudzu, a embeya Solomoni khuye: ‘Israyeli a na duswa ndrangani gwago a bwe a kabaniswa khu sipandre sivili. Nyi na ningeya gipandre nya gikhongolo ga moyo nya sithumi sago, nigu ndranga yago yi na fumeya gipandre nya gidugwana.’

Jehovha a di gira gu esi a nga ba a hungide si wonega gwadi khu yimbe ndziya. Yeyedzide isoso tepo Jerobhowamo, githumi gya Solomoni, a nga ba a gimbiya ndziyani, ganiolu a manana ni muprofeti Ayiya. Ayiya a di pferula tshalo yaye khu 12 sipandre a vbedza a embeya Jerobhowamu khuye: ‘Jehovha a na dusa mufumo wa Israyeli ndrangani ga Solomoni a wu kabanisa khu sipandre sivili. Dzega sipandre sesi nya 10 kholu uwe u na fumeya 10 mahundzu.’ Tepo Pfhumu Solomoni a ngapwa isoso, a di vbweta gu songa Jerobhowamo! Khu kharato, Jerobhowamo a di tutuma a hongola Egipto. Khu gu gimbiya nya tepo, Solomoni a difa, khavbovbo gyanana gyaye Robhowamo gi di khala pfhumu. Khu kharato, Jerobhowamo a di si wona na si ningana gu bweleya Israyeli.

 Madhota ya Israyeli ma di embeya Robhowamo khayo: ‘Wo va phara gwadi vathu, va na gu engisa.’ Ganiolu, madzaha nyo khaguri ma nga ba mari dzipari dza Robhowamo ma di khayo: ‘Va tshanise sa, u bwe u va ninga mithumo nyo lemeye ngudzu!’ Robhowamo a di engisa esi a nga embedwa khu dzipari dzaye. A di tshanisa vathu, khavbovbo avo va di diga gu mu engisa. Va di emisa Jerobhowamo kha nga pfhumu nya 10 mahundzu. Gipandre gyogyo, gi hegiside khu gu tidwa kha nga mufumo wa Israyeli. Egi gimbe nya mahundzu mavili gi di tidwa kha nga mufumo wa Judha. Mahundzu yoyo ya mavili, ma di engisa Robhowamo. Olu mahundzu yaya nya 12 ma di kabanisidwe.

Jerobhowamo kha nga ba a vbweta gu khuye vathu vaye va hongola Jerusalema va ya khozeya, a gu umo gu nga ba gu fumedwa khu Robhowamo. U ngu dziti gu khuwe khu ginani? Jerobhowamo a di gu thava gu khuye vathu va mu diga, va ya dzi pata ni Robhowamo. Khu kharato, a di gira sifananiso nya simombyana khu ouro a vbedza a embeya vathu vaye khuye: ‘Jerusalema hwindzo ngudzu. Khozeyani avba.’ Khavbovbo, vathu va di pheya gu khozeya simombyana soso nya ouro, va diga Jehovha.