Ciindi Solomoni naakali kukomba Jehova, kwakali luumuno mu Israyeli. Pele Solomoni wakakwata bamakaintu banji ibakali kuzwa kumasena aambi, alimwi bamakaintu aaba bakali kukomba ba leza bakubeja. Aboobo asyoonto-syoonto Solomoni wakacinca akutalika kukomba mituni. Jehova wakanyema. Wakaambila Solomoni kuti: ‘Israyeli uyakwaandanizyigwa muzibeela zyobilo. Cibeela cipati ciyoopegwa kumubelesi wako umwi, mpoonya mukwasyi wako uyoolela buyo kabeela kasyoonto.’

Ncaakaamba Jehova wakacisalazya munzila aimbi. Umwi wababelesi ba Solomoni, Jeroboamu, wakali kweenda munzila naakaswaanganya musinsimi Ahija. Ahija wakazapaula cisani cakwe mutubeela tuli 12 akwaambila Jeroboamu kuti: ‘Jehova uyoobubweza bwami bwa Israyeli kuzwa kumukwasyi wa Solomoni akubwaandaanya muzibeela zyobilo. Kobweza tubeela tuli 10 twacisani eeci nkaambo uyooba mwami wamisyobo iili 10.’ Mwami Solomoni wakaamvwa makani aaya alimwi wakali kuyanda kumujaya Jeroboamu! Aboobo Jeroboamu wakatijila ku Egepita. Mukuya kwaciindi, Solomoni wakafwa mpoonya mwanaakwe Rehoboamu wakaba mwami. Kumane Jeroboamu wakayeeya kuti apiluke ku Israyeli nkaambo ooyo ngwaakali kuyoowa wakafwa.

 Baalu bamu Israyeli bakaambila Rehoboamu kuti: ‘Ikuti naa ubeendelezye kabotu bantu, banoosyomeka kulinduwe.’ Pele beenzinyina Rehoboamu bakamwaambila kuti: ‘Weelede kubeendelezya calunya bantu! Kobabelesya kapati!’ Rehoboamu wakaswiilila lulayo lwabeenzinyina. Wakaba silunya kubantu, aboobo bakazanga. Bakabikka Jeroboamu kuba mwami wamisyobo iili 10, yalo iyakazikwiitwa kuti bwami bwa Israyeli. Misyobo iimbi yobilo yakazikwiitwa kuti bwami bwa Juda, alimwi yakazumanana kusyomeka kuli Rehoboamu. Misyobo iili 12 ya Israyeli lino yakaandaana.

Jeroboamu tanaakali kuyanda kuti bantu bakwe kabaunka kuyookomba ku Jerusalemu, yalo iyakali mubwami bwa Rehoboamu. Sena ulikazyi kaambo? Jeroboamu wakali kuyoowa kuti balamucincila maano bantu akuba kulubazu lwa Rehoboamu. Aboobo wakapanga boombe bangolida bobilo akwaambila bantu kuti: ‘Ku Jerusalemu nkulamfwu kapati. Mulakonzya kukomba nkukonya okuno.’ Bantu bakatalika kukomba boombe bangolida, aboobo bakamuluba Jehova alimwi.