Obusumi bwona Sulemani yamazire ali Mwesigwa hali Yahwe, Isareri ekaikara omu obusinge. Baitu Sulemani akaswera abakazi baingi abanyamahanga kandi abaramyaga ebisisani. Mporampora, bakahindura omutima gwa Sulemani nauwe yatandika kuramya ebisisani. Yahwe akabihirwa muno kandi yagambira Sulemani ati: ‘Obukama bwa Isareri nibwija kwihwa omu b’eka yaawe kandi bubaganizibwemu ebicweka bibiri. Ekicweka ekikooto ninyija kukiha omu ha bahereza bawe, kandi eka yawe eralemaga ekicweka ekitaito.’

Yahwe akongera yasoborra kurungi encwamu ye omu mulingo ogundi. Omu ha bahereza ba Sulumani arukwetwa Yeroboamu, akaba ali omu muhanda n’agenda yatangatangaana nabbi Ahiya. Nabbi onu akakwata eky’okujwara kye yakitemuramu ebicweka 12 kandi yagambira Yeroboamu ati: ‘Yahwe n’agenda kwiha obukama bwa Isareri omu ka ya Sulemani kandi abubaganizemu ebicweka bibiri. Twara ebicweka ikumi eby’orugoye habwokuba noija kuba omukama w’enganda ikumi eza Isareri.’ Omukama Sulemani obu yakihuliire, akagonza kwita Yeroboamu! Eki kikaletera Yeroboamu kwiruka yagenda omu ihanga lya Misiri. Hanyuma y’akasumi, Sulemani akafa nukwo mutabani we Rehoboamu yafooka mukama. Obu nubwo Yeroboamu yagarukire omu Isareri habwokuba hakaba hatakyaliyo kabi.

 Abakuru ba Isareri bakagambira Rehoboamu bati: ‘Obworatwaza kurungi abantu, nibaija kukutamu obwesige.’ Baitu enganjani za Rehobamu ab’emyaka ye bakamugambira bati: ‘Abantu osemeriire kubakwata n’omukono gw’ekyoma! Kandi obongere n’emirimo y’okukora!’ Rehoboamu akahondera amagezi g’abasigazi bagenzi be. Abantu akabatwaza kubi kandi n’abo bacwamu kumujemera. Bakafoora Yeroboamu mukama w’enganda ikumi ezamanyirwe nk’obukama bwa Isareri. Enganda ibiri ezasigaireho zikatandika kwetwa obukama bwa Yuda kandi abantu b’obukama bunu bakaikara bali besigwa hali Rehoboamu. Gunu nugwo omulingo enganda 12 eza Isareri zabaganizibwemu.

Yeroboamu akaba atarukugonza abantu be kugenda kuramiza Yerusalemu habwokuba orubuga runu rukaba omu bukama bwa Rehoboamu. Omanyire habwaki? Habwokuba akatiina ngu abantu bakaba nibasobora kumwecwaho kandi bakatandika kusagika Rehoboamu. Nahabweki akakora ebisisani bibiri eby’enyana ez’ezaabu nukwo yagambira abantu be ati: ‘Yerusalemu eri hara muno. Nimusobora kuramiza hanu.’ Abantu bakatandika kuramya enyana ez’ezaabu kandi bayebwa Yahwe.