Соломон Иеговага дыңнангыр чорда, Израильге амыр-тайбың турган. Ынчалза-даа чоорту Соломон дүрзү-бурганнарга чүдүүр чоннардан кадайлар ап алгаш, боду база дүрзү-бурганнарга чүдүп эгелээн. Иегова аңаа таарзынмаан. Ол Соломонга: «Чагыргаң алгаш, ону ийи кезекке чарып каар мен. Хөй кезиин чалчаңга бээр мен, а эвээш кезиин — ук-салгалыңга» — дээн.

Иегова шиитпирин мынчаар тода тайылбырлап берген. Соломоннуң бир чалчазы, Иеровоам, орукка Ахия дээр медээчиге ужуражы берген. Медээчи хевин 12 кезекке ора тырткаш, Иеровоамга мынча дээн: «Иегова Соломоннуң чагыргазын алгаш, ону ийи кезекке чарып каар. Сен он кезээн алыр сен, чүге дизе он аймактың хааны боор сен». Соломон хаан ооң дугайында билип кааш, Иеровоамны өлүрер деп барган! А Иеровоам Египетче дезе берген. Соломон өлүп каарга, ооң оглу Ровоам чагырып эгелээн. Ынчан Иеровоам ам айыыл чок деп билгеш, дедир Израильче чедип келген.

 Израильдиң удуртукчулары Ровоамга мынча дээн: «Улусту эки аажылаар болзуңза, олар сеңээ бердинген болур». Ынчалза-даа Ровоамның аныяк эштери мынча деп сүмелээн: «Оларны кээргээш чоор сен! Ам-даа эки ажылдат!» Ровоам эштериниң сүмезин эдерип, улусту каржы аажылаарга, он аймак аңаа удур тура халаан. Оон олар Иеровоамны хааны кылып алган. Ол он аймакты Израиль күрүне деп адап эгелээн. А ийи аймак Ровоамга шынчы арткан. Оларны Иуда күрүне деп адап эгелээн. Ам 12 израиль аймак ийи күрүнеге чарлы берген.

Иеровоам улустуң Иерусалимче баргаш, Иеговага мөгеерин күзевейн турган. Чүге, билир сен бе? Улус Ровоамның талазынче туруп алыр деп бодааш, ол коргуп, ийи алдын бугажыкты кылып каан. Ол чонга мынча дээн: «Иерусалим дыка ырак-тыр. Бурганга маңаа бараалгаңар». Чон алдын бугажыктарга мөгейип эгелээш, Иеговага бараалгавайн барган.