Сулаймон Яҳовага топиниб юрганида Исроилда тинчлик ҳукм сурди. Лекин у бегона халқлардан бўлган кўпгина бутпараст аёлларга уйланди. Сулаймон аста-секин хотинларига ўхшаб бутларга сажда қила бошлади. Бундан Яҳованинг жаҳли чиқиб, унга шундай деди: «Исроил шоҳлиги оилангдан тортиб олиниб, иккига бўлинади. Шоҳликнинг катта қисмини хизматкорларингдан бирига бераман. Сенинг оиланг эса шоҳликнинг кичик бир қисми устидан бошқаради, холос».

Кейин Яҳова бу қарорини яна бир бор тасдиқлади. Сулаймоннинг хизматкори Ёрубом йўлда кетаётганида Охиё исмли пайғамбарга дуч келди. Охиё эгнидаги камзулини 12 бўлак қилиб йиртди ва Ёрубомга қуйидагиларни айтди: «Яҳова Сулаймоннинг оиласидан Исроил шоҳлигини тортиб олиб, уни иккига бўлади. Мана бу ўнта бўлакни олинг, чунки сиз ўнта қабила устидан шоҳ бўласиз». Шоҳ Сулаймон бу ҳақда эшитиб, Ёрубомни ўлдирмоқчи бўлди. Ёрубом эса Мисрга қочиб кетди. Вақт ўтиб, Сулаймон вафот этди ва унинг ўғли Рахабом шоҳ бўлди. Шунда Ёрубом «Энди Исроилга қайтсам бўлади», деб ўйлади.

 Исроил оқсоқоллари Рахабомга: «Агар халққа яхши муносабатда бўлсангиз, улар сизга садоқатли бўлишади»,— деб айтишди. Аммо Рахабомнинг ёш дўстлари: «Халққа қаттиққўл бўлишингиз керак! Уларни янада кўпроқ ишлатишингиз керак!» — дейишди. Рахабом дўстларининг маслаҳатига қулоқ солди. У халққа шафқатсиз муносабат кўрсатди ва Исроилнинг ўнта қабиласи унга қарши исён кўтарди. Улар Ёрубомни Исроилнинг ўнта қабиласи устидан шоҳ этиб тайинлашди ва бу шоҳлик Исроил шоҳлиги деб аталди. Шу йўсин, Исроилнинг 12 та қабиласи иккига бўлинди.

Рахабом Қуддусда шоҳлик қиларди. Ёрубом халқ топиниш учун у ердаги маъбадга боришини истамади. Негалигини биласизми? Ёрубом халқ ундан юз ўгириб, Рахабомни қўллаб-қувватлашидан қўрқди. Шу боис, у олтиндан иккита бузоқ ясади-да, халққа шундай деди: «Қуддус жуда узоқ. Мана шу ерда ҳам топинсангиз бўлади». Одамлар шу олтин бузоқларга сиғина бошлашди ва Яҳовани яна эсдан чиқаришди.