Musi Salomo a tshi kha ḓi rabela Yehova, ho vha hu na mulalo Isiraele. Fhedzi Salomo a vhinga vhafumakadzi vhanzhi vha bvaho kha maṅwe mashango, nahone vhenevha vhafumakadzi vho vha vha tshi rabela zwifanyiso. Nga zwiṱuku nga zwiṱuku, Salomo a shanduka, na ene a thoma u rabela zwifanyiso. Yehova a sinyuwa vhukuma. A vhudza Salomo a ri: ‘Muvhuso wa Isiraele u ḓo bva muṱani waṋu nahone u ḓo bva zwipiḓa zwivhili. Tshipiḓa tshihulwane ndi ḓo tshi ṋea muṅwe wa vhashumeli vhaṋu, nahone muṱa waṋu u ḓo vhusa tshipiḓa tshiṱuku.’

Yehova o dovha a bvisela khagala phetho yawe nga iṅwe nḓila. Muṅwe wa vhashumeli vha Salomo, Yerobeamu, o vha a tshi khou tshimbila nḓilani misi a tshi ṱangana na muporofita Ahia. Ahia a kherukanya tshiambaro tshawe tsha bva zwipiḓa zwa 12 nahone a vhudza Yerobeamu a ri: ‘Yehova u ḓo dzhiela muṱa wa Salomo muvhuso wa Isiraele nahone a u fhandekanya wa bva zwipiḓa zwivhili. Dzhiani hezwi zwipiḓa zwa fumi nga uri ni ḓo vha khosi ya tshaka dza fumi.’ Khosi Salomo a pfa nga ha enea mafhungo nahone a ṱoḓa u vhulaha Yerobeamu! Yerobeamu a shavhela Egipita. Nga u ya ha tshifhinga, Salomo a fa nahone ṅwana wawe Rehabeamu a vha ene khosi. Yerobeamu a pfa o tsireledzea u vhuyelela Isiraele.

 Vhahulwane vha Isiraele vha vhudza Rehabeamu vha ri: ‘Arali na fara vhathu zwavhuḓi, vha ḓo fulufhedzea kha inwi.’ Fhedzi khonani dza Rehabeamu dze a aluwa nadzo dza ri: ‘Ni tea u fara vhathu nga nḓila ya tshiṱuhu! Itani uri vha shumese!’ Rehabeamu a tevhedza nyeletshedzo ya khonani dze a aluwa nadzo. O fara vhathu nga nḓila ya tshiṱuhu nahone vha mu shandukela. Vha vhea Yerobeamu uri a vhe khosi ya tshaka dza fumi, dze dza ḓivhiwa sa Muvhuso wa Isiraele. Dziṅwe tshaka mbili dza ḓivhiwa sa muvhuso wa Yuda, nahone vha bvela phanḓa vha tshi fulufhedzea kha Rehabeamu. Tshaka dza 12 zwino dzo fhandekana.

Yerobeamu ho ngo tendela vhathu vhawe vha tshi ya u rabela Yerusalema, he ha vha hu muvhusoni ya Rehabeamu. Ni a ḓivha u ri ndi ngani? Yerobeamu o vha a tshi khou shavha uri vha ḓo mu shandukela nahone vha tikedza Rehabeamu. Nga zwenezwo a ita ṋamana mbili dza musuku nahone a vhudza vhathu vhawe a ri: ‘Yerusalema ndi kule. Ni nga rabela henefha.’ Vhathu vha thoma u rabela ṋamana dza musuku nahone vha dovha vha hangwa Yehova.