Han ginsisingba pa ni Solomon hi Jehova, may kamurayawan ha Israel. Pero nag-asawa hiya hin damu nga babaye tikang ha iba nga nasud nga nagsisingba ha mga dios-dios. Hinay-hinay nga nagbag-o hi Solomon ngan nagsingba gihap ha mga dios-dios. Nasina hi Jehova. Iya ginsidngan hi Solomon: ‘An Israel kukuhaon ha imo pamilya ngan mababahin ha duha. Ihahatag ko an daku nga bahin ha usa han imo mga surugoon, ngan an gutiay la nga bahin an pagmamandoan han imo pamilya.’

Ha usa pa nga paagi, ginklaro ni Jehova nga ito gud an mahitatabo. Samtang nagbabaktas an surugoon ni Solomon nga hi Jeroboam, nakatapo niya hi propeta Ahias. Gin-gisigisi ni Ahias an iya bado ha 12 ka pidaso ngan ginsidngan hi Jeroboam: ‘Kukuhaon ni Jehova an ginhadian han Israel ha pamilya ni Solomon ngan babahinon ito ha duha. Kuha dinhi hin napulo ka pidaso kay maghahadi ka ha napulo nga tribo.’ Hinbaroan ini ni Solomon, salit gin-ikaparatay niya hi Jeroboam. Pinalagiw hi Jeroboam ngadto ha Ehipto. Paglabay han panahon namatay hi Solomon, ngan an iya anak nga hi Rehoboam an naghadi. Salit naghunahuna hi Jeroboam nga puydi na hiya umuli ha Israel kay diri na hiya namimilegro.

 An katigurangan han Israel nagsiring kan Rehoboam: ‘Kon oopayon mo pagtratar an katawohan, magmamaunungon hira ha imo.’ Pero an kasangkayan ni Rehoboam nga iya mga kaedad nagsiring: ‘Kinahanglan pakurian mo an mga tawo! Pabug-ata pa an ira trabaho!’ Namati hi Rehoboam ha iya mga kaedad. Ginpakurian niya an mga tawo, salit nagrebelde hira. Ginhimo nira hi Jeroboam nga hadi han napulo nga tribo, nga ha urhi gintawag nga ginhadian han Israel. An duha nga nahibilin nga tribo gintawag nga ginhadian han Juda, ngan nagpabilin hira nga maunungon kan Rehoboam. Hito nga paagi, nabahin an 12 nga tribo han Israel.

Nadiri hi Jeroboam nga an iya katawohan magsingba ha Jerusalem, nga sakop ni Rehoboam. Maaram ka kon kay ano? Nahadlok hiya nga kontrahon han mga tawo ngan sumuporta hira kan Rehoboam. Salit naghimo hiya hin duha nga bulawan nga nati nga baka ngan ginsidngan an mga tawo: ‘Hirayo gud an Jerusalem. Dinhi na la kamo pagsingba.’ Ginsingba han mga tawo ito nga mga baka ngan ginkalimtan na liwat hi Jehova.