Ndaŵi jele Solomoni ŵalambilaga Yehofa, yindu yajendaga cenene mu Yisalayeli. Nambo Solomoni ŵalombele acakongwe ŵajinji ŵakutyocela m’yilambo yine. Jemanjaji ŵalambilaga milungu jakupanganyidwa. Mwapanandipanandi Solomoni ŵacenjile, mwamti ŵatandite kulambila milungu jakupanganyidwajo. Yehofa ŵatumbile ni yeleyi. Jwalakwe ŵamsalile Solomoni kuti, ‘Ucimwene wa Yisalayeli ciwucityoka m’liŵasa lyenu soni ucigaŵikana paŵili. Mbali jekulungwa tinjijipeleka kwa jumo mwa ŵakutumicila ŵenu, soni liŵasa lyenu licilamulila mbali jamnono pejo.’

Yehofa ŵatendekasisye kuti yaŵasakaga kutendayo yipikanice cenene m’litala line. Yelobowamu jumo mwa ŵakutumicila ŵa Solomoni ali pawulendo, ŵasimene ni jwakulocesya Ahiya. Jwakulocesyaju ŵapapwile cakuwala cakwe mapisi 12, soni ŵamsalile Yelobowamu kuti, ‘Yehofa cacityosya ucimwene wa Yisalayeli m’liŵasa lya Solomoni ni kuwugaŵa paŵili. Mjigale mapisi 10 aga ligongo cimciŵa mwenye jwa mitundu 10.’ Mwenye Solomoni paŵapikene yeleyi ŵasakaga kum’wulaga Yelobowamu. Jwalakwe ŵatilile ku Iguputo. Lehobowamu ŵajinjile ucimwene paŵawile Solomoni. Pandaŵi jeleji Yelobowamu ŵayimanyi kuti pangali cakogoya campaka cimtendecele ni ŵawujile ku Yisalayeli.

 Acakulungwa ŵane mu Yisalayeli ŵamsalile Lehobowamu kuti, ‘Naga mkwalongolela cenene ŵanduŵa caciŵa ŵakulupicika kwa mmwejo.’ Nambo acimjakwe ŵa Lehobowamu ŵaŵaliji ŵacinyamata ŵamsalile kuti, ‘Mkanyenjelelaga ŵanduŵa, mwapeje masengo gakupweteka.’ Ni Lehobowamu ŵakuyisye yaŵamsalile ŵacinyamatawo. Jwaliji jwangalwe kwa ŵandu, soni ŵanduwo ŵamjimucilaga. Kaneko ŵanduwo ŵamsagwile Yelobowamu juŵaŵele mwenye jwa mitundu 10 ja Yisalayeli. Mitundu jiŵili jakusigala jila jamanyikwaga kuti ucimwene wa Yuda, soni jemanjajo ŵajendelecele kuŵa ŵakulupicika kwa Lehobowamu. Pelepa mitundu 12 ja Yisalayeli jagaŵikene.

Yelobowamu nganasakaga kuti ŵandu ŵakwe ajawuleje kukulambila ku Yelusalemu kwakwaliji ucimwene wa Lehobowamu. Ana mkumanyilila ligongo lyakwe? Yelobowamu ŵajokopaga kuti ŵanduwo cakatyoce kumbali jakwe ni kuŵa kumbali ja Lehobowamu. Jwalakwe jwapanganyisye ŵanace ŵaŵili ŵa ng’ombe ni kwasalila ŵanduwo kuti, ‘Ku Yelusalemu kutalice. Mpaka mlambileje kunokuno.’ Ŵanduwo ŵamlesile Yehofa ni kutanda kulambila ŵanace ŵa ng’ombewo.