Teʼ kʼiinoʼob táan u adorartaʼal Jéeoba tumen Salomonoʼ anchaj jeetsʼelil tu luʼumil Israel. Chéen baʼaleʼ Salomoneʼ tsʼoʼok u beel yéetel yaʼab koʼoleloʼob táanxel luʼumiloʼob ku adorartikoʼob kaʼach beetbil diosoʼob. Salomoneʼ jujunpʼíitileʼ joʼopʼ xan u adorartik beetbil diosoʼob. Jéeobaeʼ jach pʼuʼujeʼ ka tu yaʼalajtiʼ: ‹Yaan in luʼsik u reinoil Israel tiʼ a láakʼtsiloʼob yéetel yaan in jóoʼsik kaʼa jaats tiʼ. Yaan in tsʼáaik le jaats maas nojoch tiʼ juntúul tiʼ le máaxoʼob meyajtikechoʼ, a láakʼtsiloʼobeʼ yaan u reinaroʼob yóokʼol le jaats maas chichanoʼ›.

Ka tsʼoʼokeʼ Jéeobaeʼ tu beetaj junpʼéel baʼal utiaʼal ka naʼataʼak le baʼax tu yaʼaloʼ. Jeroboán, juntúul tiʼ le máaxoʼob meyajtik Salomonoʼ, jóokʼ tu kaajil Jerusalén. Le táan u binoʼ ilaʼab tumen Ahíya, le profetaoʼ. Ahiyaeʼ tu luʼsaj le nookʼ u takmoʼ, tu jateʼ ka tu jóoʼsaj 12 xéexetʼal tiʼ. Ka túun tu yaʼalaj tiʼ Jeroboán: ‹Jéeobaeʼ yaan u luʼsik u reinoil Israel tiʼ u láakʼtsiloʼob Salomón yéetel yaan u jóoʼsik kaʼa jaats tiʼ. Chʼaʼ 10 u xéexetʼal le nookʼaʼ, tumen teech kan reinar yóokʼol 10 tribus›. Ka tu yojéeltaj Salomoneʼ taakchaj u kíimsik Jeroboán. Le oʼolal Jeroboaneʼ púutsʼi ka bin Egipto. Ka máan kʼiineʼ Salomoneʼ kíimi, ka káaj u reinar Rehoboam, u hijo. Jeroboán túuneʼ suunaj tu kaajil Israel tumen tu tuklaj mix máak jeʼel u taaktal u kíimskeʼ.

 Ka tsʼoʼokeʼ u nuuktakil u luʼumil Israeleʼ tu yaʼaloʼob tiʼ Rehoboam: ‹Wa ka tratartik maʼalob le kaajoʼ, letiʼobeʼ yaan u meyajtikechoʼob mantatsʼ›. Chéen baʼaleʼ le táankelem xiʼipalaloʼob ku biskubaʼob tu yéeteloʼ, tu yaʼaloʼobtiʼ: ‹Maʼ unaj a weʼesik a wutsil tiʼ le kaajoʼ. Beet u maas meyajoʼob›. Rehoboameʼ tu beetaj le baʼax aʼalaʼabtiʼoʼ, jach tu beetaj u kʼasaʼanil tiʼ le máakoʼoboʼ. Le oʼolaleʼ letiʼobeʼ tu tsʼáajubaʼob tu contraeʼ, ka tu tsʼáajoʼob Jeroboán reinar yóokʼol le 10 tribusoʼ. Le reino yaan 10 tribus tiʼoʼ kʼuch kʼaj óoltbil u reinoil Israel. Le reino yaan kaʼapʼéel tribus tiʼoʼ kʼaj óoltaʼab bey u reinoil Judaeʼ, letiʼobeʼ mantatsʼ tu beetoʼob le baʼax tu yaʼalaj Rehoboamoʼ. Bey úuchik u jaʼatsal le 12 tribus yaan Israeloʼ.

Jerusaleneʼ tiaʼan kaʼach yáanal u reino Rehoboameʼ. Jeroboaneʼ maʼ u kʼáat kaʼach ka xiʼik le máaxoʼob ku gobernartik u adorartoʼob Jéeoba teʼeloʼ. ¿A wojel wa baʼaxten? Tumen sajak kaʼach maʼ u seguer u yuʼubaʼal u tʼaan, baʼaxeʼ ka uʼuyaʼak u tʼaan Rehoboam. Le oʼolal tu beetaj kaʼatúul mejen wakax de oroeʼ ka tu yaʼalaj tiʼ le kaajoʼ: ‹Jach náach yanil Jerusalén. Maas maʼalob ka pʼáatkeʼex a adorarteʼex le kaʼatúul mejen wakaxoʼobaʼ›. Le máakoʼoboʼ tu beetoʼob le baʼax tu yaʼaloʼ ka tu tuʼubsoʼob Jéeoba tu kaʼatéen.