Órni Salomón biembu Jehová goxtiguie bibany israelitas. Per láabu bitzñabu né xidal buñgonaʼ de stipnés gudx ni bieen dioxh falz. Dxoga dxoga Salomón bitzaʼbu né gosalóbu biembu dioxh falz. Jehová bidzuitz né góoch láabu: «Ma diti xfamilylo sony mandary Israel, satzoya láani ló chop midid. Sadudi ni más xiroʼ xomóslo né xfamilylo siané ni más mit».

Jehová bunybu toib cós par guirá buñ ñentzaay ni goniʼbu. Toibtica xomós Salomón ni góc laa Jeroboán gonbu profeta Ahíya ló néz. Profetacu goleʼbu xhap loguiaʼbu né bichésbu láani ló 12 laʼ. Né ór cú gochbu Jeroboán: «Jehová sabeʼbu galmandary reʼ xfamily Salomón né satzobu láani ló chop midid. Cuaʼ 10 laʼ lairy reʼ portín looy saclo rey xtuny 10 family». ¡Órni Salomón gonbu guirá ni goniʼ Ahíya nábu nagaitybu Jeroboán! Por ngú Jeroboán bixony goyee Egipto. Godudy íz Salomón goity né xiimbu Rehoboam gosaló buny mandary xalagarybu. Ór cú Jeroboán bibiguetbu Israel portín bunybu pensary que ma yadi ni ná guigaity láabu.

Después ancianos xtuny Israel gochyibu Rehoboam: «Buñ gudx reʼ diti sasian looy pal ranlo layibu». Per Rehoboam  bidzakbu pór mbioxhlas, né layibu gochyibu Rehoboam: «Diti gaplo paseinys buñ gudx reʼ. Biduidy dxiin nanaa layibu». Rehoboam bisob ni goniʼ guirá mbioxhlascu né gócbu buñ mal. Por ngú buñ bisian Rehoboam né Jeroboán gosaló buny mandary 10 family xtuny Israel. 10 family ro buny mandary Jeroboán góc laani gobierno xtuny Israel. Xchop family ro buny mandary Rehoboam góc laani gobierno xtuny Judá. Modcu bidzoo 12 family xtuny Israel.

Jerusalén goyoʼni niis ro buny mandary Rehoboam. Jeroboán diti goniiny láabu que buñ xcudxbu ñee Jerusalén par ñenyibu Jehová cú. ¿Nanlo xigony la? Portín Jeroboán bidzuibybu que buñ ñac toibsi né Rehoboam né ma diti nasob láabu. Por ngú, bisaʼbu chop torlas de or, né gochbu buñ: «Sitgoluʼ noʼ Jerusalén. Más galán guiaʼanto reʼ né guiento torlas ni bisaʼya». Buñ bisobdiitz láabu né bialadxyibu Jehová stoib.