Ker me kaka apar me Icrael obedo ki kabaka maraco mapol, ento kabaka ma dong rac loyo obedo Akab. En onyomo dako ma kite rac ma woro jok Baal. Nying dako-ni Jejebel. Akab ki Jejebel gunyayo woro jok Baal i lobo Icrael ducu dok guneko lunebi pa Jehovah. Ngo ma Jehovah otimo? En ooro lanebi Elia ni oter kwena mo bot Akab.

Elia owaco bot Kabaka Akab ni kot pe bicwer i lobo Icrael pi bal ma en otimo-ni. Pi mwaka makato adek, cam pe ocek dok kec oneko dano. Lacen Jehovah ooro Elia ni odok cen bot Akab. Kabaka owaco bote ni: ‘In layela-ni! Man ducu obedo balli.’ Elia ogamo ni: ‘Pe an aye amiyo piny otwo woko. Man otimme pien ibedo ka woro jok Baal. Wabibedo ki pyem me niang anga ma obedo Lubanga me ada. Cok jo Icrael ducu ki lunebi pa Baal bene i Wi Got Karmel.’

Dano ducu gucokke i wi got. Elia owacci: ‘Wumok tamwu. Ka ce Jehovah aye Lubanga me ada, wulub en. Ento ka Baal, ci wutugi lubo en cut. Wabedu kong ki pyem man. Lunebi 450 pa Baal myero guyub gityer ci guleg bot lubangagi, an bene abiyubo gityer ci alego bot Jehovah. Lubanga ma bidok iye ki cwalo mac en aye Lubanga me ada.’ Lwak guye lok man.

Lunebi pa Baal guyubo gityergi. Gulwongo nying lubangagi cakke odiko nio wa i cwiny dyeceng kun giwaco ni: ‘Ai Baal, dokkiwa iye do ya!’ I kare ma Baal pe ogamo, Elia ocako cayogi. En owacci: ‘Wudange matek. Gwok nyo pud onino woko, ci myero kong wucoye ki i wang nino.’ Lunebi pa Baal gumedde ki lwongo lubangagi kun gidange adanga nio wa otyeno. Ento piny oling litik.

Elia oyubo gityere, oketo i kom keno tyer ka oonyo pii madwong iye. Ci olego ni: ‘Ai Jehovah, wek tin dano ducu gunge atir ni in aye Lubanga me ada.’ Cutcut, Jehovah ocwalo mac ki i polo owango gitum awanga woko. Lwak gudange ni: ‘Jehovah aye Lubanga me ada!’ Elia owaco ni: ‘Pe wuwek lunebi pa Baal gubwoti!’ I nino  meno, kineko lunebi 450 pa Baal ducu.

I kare ma latin pol mo otinge i wi nam, Elia owaco bot Akab ni: ‘Kot tye ka bino magwar. Yub gadigadini idok gang.’ Te polo ocido woko ki pol, yamo okodo, ci kot ocako cwer madwong. Two pa piny dong ogik. Akab ongweco madwir adada ki gadigadine. Ento ki kony pa Jehovah, Elia ongweco madwir okato aguragura ma obedo ka telo gadigadi-ni woko! Onongo dong peko pa Elia ducu otum woko? Kong wanenu.