Jubim ma reco ubino dupa m’ucamu ker iwi suru apar mir Israel. Ento ubimo Ahab ubino ku timo ma rac m’usagu mi jubim mange ceke. Egamu dhaku ma kura pare rac m’ubed uworo Bal. Nying’ dhakune ubino Yezebel. Ahab giku Yezebel giketho dhanu ma pol ucaku timo thier ni Bal, man gibed gisendo jubila pa Yehova man ginego kadok jumoko anega zoo. Dong’ Yehova ugam utimo ang’o? Eoro jabila Eliya uter kwenda moko ni Ahab.

Eliya uwok uwacu ni ubimo Ahab nia calu m’ebetimo lembe ma reco, koth bicwii ngo i ng’om mir Israel. Pi oro ma kadhu adek, cam ucek ungo i ng’ombe, eno uketho kec upodho. I ng’eye, Yehova uoro Eliya kendo i bang’ Ahab. Ubimo Ahab uwok uwacu ni Eliya kumae: ‘Eni zoo tie lembe m’ibenyayu in! Tin ka koth ubecwii ngo, tie kosa peri.’ Eliya udwoko ire kumae: ‘Etie kosa para ngo. In re m’iketho koth ubecwii ngo pilembe ibeworo Bal. Waketim lembe moko ma binyutho nia ng’a ma tie Mungu mandha. Cok dhu dhanu mir Israel ceke man cok jubila pa Bal bende iwi got Karmel.’

Dhanu ugam ucokiri iwi got. Eliya uwacu kumae: ‘Wung’ii ng’atu acel ma wucopo woro. Tek Yehova tie Mungu mandha, wuwore. Ento tek Bal re m’utie mungu mandha, e wuwore. Watimu kumae: Jubila 450 pa Bal giyik lam migi man gilwong’ mungu migi. An de abiyiko lam man abilwong’o Yehova. Mungu ma bidwoko ku mac ci nwang’u etie Mungu mandha.’ Dhanu gigam giyio lembe maeno.

Jubila pa Bal giyiko lam migi. Gilwong’o mungu migi duu, giwacu kumae: ‘E Bal, winj dwandwa do!’ Kinde ma gikuro kpe Bal ubedwoko ngo igi lembe, Eliya ucaku nywarugi. Ewacu kumae: ‘Saa moko nyo ebenindo aninda. Wulwong’e ma tek kara ecew.’ Jubila pa Bal gilwong’o Bal nitundo reto. Ento edwoko ngo igi lembe moko.

Eliya bende uketho lam pare iwi pemblam man ecoro pii iwi lamne. I ng’eye erwo i bang’ Yehova kumae: ‘E Yehova, ketim lembe moko kara dhanu m’upong’ keni ging’ei nia in re m’itie Mungu mandha.’ Ndhundhu nica, Yehova uoro mac kud i polo man uwang’u lam ceke. E dhanu gikok kumae: ‘Yehova re ma tie Mungu mandha!’ Eliya uwacu  kumae: ‘Kud wuwek jubila pa Bal uringi!’ Cing’ nica, junego jubila pa Bal 450.

I ng’eye, afuru moko uwok nyanok yor iwi nam. Eliya uyero ni Ahab kumae: ‘Yamu ma tek ubebino koto. Yik magali peri man idok i pacu.’ E polo uyim man yamu ma tek ucaku koto. E koth ucaku cwii lee. Koth maeno ujigo dhu ceng’ m’urieny pi nindo ma dupa. Ahab uringo ma tek ku magali pare. Ento Yehova ukonyo Eliya, uketho eringo ma tek nikadhu magali de! Nyo eno ubino ajiki mi peko pa Eliya? Wabineno.