Jahat do angka raja ni Israel na sampulu marga. Alai si Ahab ma na umjahat. Kawin do ibana dohot sahalak borua na jahat na manomba debata Baal. Goarna si Izebel. Dibunu nasida do angka panurirang ni Jahowa. Jala godang do halak na manomba Baal alani si Ahab dohot si Izebel. Aha ma na diulahon Jahowa? Disuru ma panurirang Elia pasahathon hata ni Jahowa.

Dipaboa si Elia ma tu si Ahab, ndang ro be udan di Israel alani hajahatonna. Lobi sian tolu taon, ndang adong panen. Gabe kelaparan ma bangso i. Disuru Jahowa ma muse si Elia manjumpangi si Ahab. Alai didok si Ahab ma tu ibana, ‘Alani ho do i! Ho do mambahen on sude.’ Dialusi si Elia ma, ‘Ndang alani ahu i. Alani ho do i, disomba ho do Baal. Molo ndang porsea ho, taida ma ise do Debata na sintong. Papungu ma bangso on dohot angka panurirang ni Baal di Dolok Karmel.’

Marpungu ma bangso i di dolok. Didok si Elia ma, ‘Saonari ingkon pillitonmuna do. Molo Jahowa do Debata na sintong, somba ma Ibana. Alai molo Baal do, ibana ma somba. Suru ma 450 panurirang ni Baal paradehon persembahan. Jou ma debatamuna i. Ahu pe, paradeonku ma persembahan jala hujou ma Jahowa. Manang ise na parohon api manutung persembahan i, i ma Debata na sintong.’ Setuju ma bangso i.

Diparade panurirang ni Baal ma persembahan i. Sai dijou nasida do debata Baal, ninna nasida ma, ‘Ale Baal, alusi ma hami!’ Alai ndang dialusi Baal i. Direhei si Elia ma nasida. Didok ma, ‘Pagogo soaramuna i. Na modom do ra i. Manang suru jolo sasahalak mandungoi.’ Sahat tu borngin, sai manggorai do angka panurirang ni Baal i. Alai ndang adong alusna.

Dung i, dibahen si Elia ma persembahan di mezbah, jala dibahen ma aek tusi. Martangiang ma ibana, ‘Ale Jahowa, patudu ma tu bangso on, Ho do Debata na sintong.’ Pintor dibahen Jahowa ma api turun sian langit manutung persembahan i. Gogo ma soara ni bangso i  mandok, ‘Jahowa do Debata na sintong!’ Didok si Elia ma, ‘Tangkup sude panurirang ni Baal i!’ Dung i, dibunu ma sude panurirang ni Baal na 450 halak i.

Adong ma awan na gelleng ro sian ginjang ni laut. Didok si Elia ma tu si Ahab, ‘Ro nama badai. Nangkok ma ho tu karetam jala mulak ma ho.’ Lam mangkolom ma langit, mangullus ma alogo jala gogo ma udan. Ujungna, sae ma logo ni ari. Hatop ma si Ahab mamboan karetana. Marhite huaso ni Jahowa, gabe umhatop do si Elia maringkat sian kareta i! Adong dope tantangan tu si Elia? Taida ma.