LIKE SUANLƐ 46
Sa ng’ɔ juli Karmɛli oka’n su lɔ’n
Famiɛn klunwifuɛ kpanngban be sieli Izraɛli akpasua blu’n. Sanngɛ be nun tɛ kpafuɛ’n yɛle Famiɛn Akabu. Ɔ jali bla klunwifuɛ tɛ kpa kun. Be flɛ bla sɔ’n kɛ Zezabɛli. Ɔ sɔ amuin nga be flɛ i Baali’n. Akabu nin Zezabɛli be yoli maan sran kpanngban be sɔli Baali, kpɛkun be kunnin Zoova i nuan ijɔfuɛ kpanngban. ?Ngue yɛ Zoova yoli-ɔ? Ɔ sunmɛnnin i nuan ijɔfuɛ Eli kɛ ɔ ko kan ndɛ kun kle Akabu.
Eli seli Famiɛn Akabu kɛ i klunwi’n ti’n, nzue su tɔman Izraɛli mɛn’n nun. Nzue’n jrannin lele afuɛ nsan tra su. Ɔ maan fie mun be su ninnge mun b’a fifiman, yɛ awe kunnin nvlefuɛ mun. I sin’n, Zoova sunmannin Eli kɛ ɔ ko wun Akabu wun ekun. Famiɛn’n seli Eli kɛ: ‘Wɔ ti yɛ afɛ’n o e su-ɔ.’ Eli tɛli i su kɛ: ‘Nán min ti yɛ nzue’n tɔman-ɔn. Baali mɔ amun su i’n ti-ɔ. Maan e yo like kun e nian. Se nvlefuɛ mun, ɔ nin Baali i nuan ijɔfuɛ mun kɛ e yia Karmɛli oka’n su lɔ.’
Nvlefuɛ mun be yiali oka’n su lɔ. Eli seli be kɛ: ‘Amun fa kun. Sɛ Zoova yɛ ɔ ti Ɲanmiɛn’n, amun su i! Sɛ kusu Baali yɛ ɔ ti Ɲanmiɛn’n, amun su i. É wá yó like kun é nían. Maan Baali i nuan ijɔfuɛ ya nnan ablenun (450) mun be yi tɛ be mɛn i naan be kpan flɛ i. N kusu ń má yí tɛ ń mán Zoova yɛ ń kpán flɛ́ i. Be nun kun ng’ɔ fa sin tɛ su’n yɛ ɔ ti Ɲanmiɛn’n niɔn.’ Nvlefuɛ mun be kplinnin su.
Baali i nuan ijɔfuɛ mun be fali nnɛn be siesieli i tɛ yiwlɛ kun su. Be flɛli Baali nglɛmun lele wia nun. Be seli kɛ: ‘Baali, tɛ e su!’ Kɛ mɔ Baali tɛman be su’n ti’n, Eli seli be kɛ: ‘An kpan kekle kpa. Atrɛkpa’n ɔ su lafi. Ɔ fata kɛ be tinnge i.’ Be kpannin lele nnɔsua, sanngɛ ngbɛn-ɔn. B’a timan Baali i ngan.
Eli fɛli i nnɛn liɛ’n sieli i tɛ yiwlɛ kun su. Kpɛkun ɔ guali su nzue kaka kpa. Ɔ srɛli Ɲanmiɛn seli kɛ: ‘Zoova, yaci, yo maan sran mun be wun i wlɛ kɛ wɔ yɛ a ti Ɲanmiɛn’n niɔn.’ Kɛ ɔ kannin sɔ cɛ’n, sin fin ɲanmiɛn su lɔ wa yrali nnɛn ng’ɔ o tɛ yiwlɛ’n su’n. Nvlefuɛ mun be kpan seli kɛ: ‘Zoova yɛ ɔ ti Ɲanmiɛn’n niɔn!’ Eli seli kɛ: ‘Amun tra Baali i nuan ijɔfuɛ mun! Nán be nun kun sa wanndi!’ Cɛn sɔ’n nun’n, be kunnin Baali i nuan ijɔfuɛ ya nnan ablenun (450) mun.
I sin’n, ɲanmiɛn ble kaan kun fiteli jenvie’n i bue liɛ’n su lɔ. Ɔ maan Eli seli Akabu kɛ: ‘Nzue su wa tɔ dan kpa. Fu ɔ kakaklolo’n nun naan kɔ awlo.’ Ɲanmiɛn su lɔ mlannin, aunmuan’n fitali kpa, kpɛkun nzue’n tɔli dan kpa. Kɛ ɔ yoli sɔ’n nzue m’ɔ jrannin’n, ɔ boli tɔlɛ bo ekun. Akabu fuli i kakaklolo’n nun ɔli ndɛndɛ kpa. Zoova fanngan nun’n, Eli wanndi buli Akabu i kakaklolo’n i wun. ?Sanngɛ Eli i su sa mun be wieli? Maan e nian.
“Kpɛkuun maan be si kɛ wɔ bɔ ɔ dunman’n yɛlɛ [Zoova’n], ɔ kunngba cɛ yɛ like fi nunman ɔ sin asiɛ wunmuan’n su ɔ.” —Jue Mun 83:19.