Dakul an nagin maraot na hadi sa sampulong tribong kahadian nin Israel. Si Ahab an saro sa pinakamaraot. Nag-agom siya nin marauton na babaying nagsasamba ki Baal. Siya si Jezebel. Pinalakop ninda sa Israel an pagsamba ki Baal asin ginadan an mga propeta ni Jehova. Ano an ginibo ni Jehova? Sinugo niya an propetang si Elias para isabi ki Ahab an sarong mensahe.

Sinabi ni Elias ki Hading Ahab na dai mauran sa Israel. Labing tulong taon na dai nagtubo an mga pananom asin nagkagurutom an mga tawo. Pinabalik ni Jehova si Elias ki Ahab. Nagsabi an hadi: ‘Pirmi na sanang problema an dara mo! Kasalan mo ini gabos.’ Nagsimbag si Elias: ‘Bako man ako an dahilan kan tigmarang ini. Ika an dahilan ta nagsasamba ka ki Baal. Maggibo kita nin pagbalo para maaraman kun siisay an tunay na Diyos. Tipunon mo sa tuktok kan Bukid nin Carmel an bilog na nasyon asin an mga propeta ni Baal.’

Nagtiripon sa bukid an mga tawo. Nagsabi si Elias: ‘Magdesisyon kamo. Kun si Jehova an tunay na Diyos, sunudon nindo siya. Kun si Baal, di siya an sunudon nindo. Ini an magigin pagbalo. Dapat na maghanda nin atang an 450 propeta ni Baal asin mag-apod sa saindang diyos, tapos mahanda man ako nin atang dangan maapod ki Jehova. An saro na magsimbag paagi sa kalayo iyo an tunay na Diyos.’ Nag-uyon an mga tawo.

Naghanda nin atang an mga propeta ni Baal. Maghapon sindang nag-apod: ‘O Baal, simbaga kami!’ Kan dai magsimbag si Baal, pigparakantiyawan sinda ni Elias: ‘Kusugan pa nindo an pag-apod. ’Baad napaturog siya, kaya kaipuhan pukawon.’ Padagos sindang nag-apod ki Baal sagkod na magbanggi na. Pero dai pa man giraray nin nagsimbag.

Ibinugtak ni Elias an saiyang atang sa ibabaw kan altar tapos binubuan nin tubig. Namibi siya: ‘O Jehova, ipaaram mo po sa mga tawong ini na ika an tunay na Diyos.’ Nagpadara tulos si Jehova nin kalayo hali sa langit para tutungon an atang. Nagkururahaw an mga tawo: ‘Si Jehova an tunay na Diyos!’ Nagsabi si Elias: ‘Dai nindo  pagpadulagon an mga propeta ni Baal!’ Kan aldaw na iyan, ginaradan an 450 propeta ni Baal.

Kan magkaigwa nin sarong sadit na panganuron sa ibabaw kan dagat, sinabi ni Elias ki Ahab: ‘May maabot na makusugon na uran. Handaa an karwahe mo, umuli ka na.’ Nagdiklom an langit dahil sa panganuron, naghuyop an duros, dangan nag-uran nin makusog. Natapos man giraray an tigmara. Pinadalagan ni Ahab nin todong rikas an saiyang karwahe. Pero sa tabang ni Jehova, mas nagin marikas an pagdalagan ni Elias kisa sa karwahe! Pero tapos na daw an gabos na problema ni Elias? Hilingon ta.