Imfumu ishingi ishaleteka imikowa 10 iya bena Israele shalecita ifyabipa, nomba Imfumu Ahabu yena yalicililemo ukucita ifyabipa. Ahabu aupile umwanakashi uwalecita sana ifyabipa, kabili uwalepepa Baali. Ishina lyakwe ni Yesebele. Ahabu na Yesebele balengele abantu mu Israele monse balapepa Baali kabili baleipaya na bakasesema ba kwa Yehova. Bushe walishiba ifyo Yehova acitile? Atumine kasesema Eliya kuli Ahabu.

Eliya aebele Imfumu Ahabu ati apo yalecita ifyabipa, mu Israele monse mwali no kuba icilala. Pa myaka ukucila pali itatu, mu calo tamwali ifya kulya pantu takwali imfula. Pa numa Yehova aebele Eliya ukuya kuli Ahabu na kabili. Imfumu yaebele Eliya ati: ‘Walikwata ubwafya iwe! Niwe walenga ukuti ifi ficitike.’ Eliya ayaswike ati: ‘Te ine nalenga ukuti kube icilala. Ni we walenga pantu ulapepa Baali. Eba abantu bonse na bakasesema ba kwa Baali baye pa Lupili lwa Karmele pa kuti twishibe Lesa wa cine.’

Abantu balile pa lupili. Eliya atile: ‘Salenipo fye cimo. Yehova nga e Lesa wa cine, mukonkeni. Nga ni Baali, mukonkeni. Lelo twalaishiba Lesa wa cine. Bakasesema ba kwa Baali 450 bapekanye umutuulo e lyo bapepe kuli lesa wabo, na ine nalapekanya umutuulo kabili nalapepa kuli Yehova. Uwalatuma umulilo no koca umutuulo ninshi e Lesa wa cine.’ Abantu bonse balisumine ifyo alandile.

Bakasesema ba kwa Baali balipekenye umutuulo. Akasuba konse balepepa kuli lesa wabo abati: ‘Mwe Baali twasukeni!’ Baali talebasuka, e lyo Eliya atampa ukubaseka ati: ‘Akupundisheni. Nalimo nalaala, alefwaya uwa kumubuusha.’ Awe ne cungulo casukile cafika, bakasesema ba kwa Baali balepepa fye. Lelo Baali tabaswike.

Eliya abuulile umutuulo wakwe aubika pa ciipailo, aitilapo na menshi. E lyo apepa ati: ‘Mwe Yehova, lekeni aba bantu beshibe ukuti imwe, ni mwe Lesa wa cine.’ Apo pene fye umulilo walifumine ku muulu waoca no mutuulo. Abantu bonse bapundile abati: ‘Yehova e Lesa wa cine!’ Lyena Eliya atile: ‘Mwileka bashimapepo ba kwa Baali babutuke!’ Pali  bulya bushiku bakasesema ba kwa Baali 450 balibepeye.

Ilyo akalikumbi akanono kamoneke pa muulu wa bemba, Eliya aebele Ahabu ati: ‘Imfula iikalamba yalaisa. Nina mwi celeta lyobe kabiye ku ng’anda.’ Mu muulu mwalifiitile pa mulandu wa makumbi, no mwela walitampile ukupuupa, e lyo imfula iikalamba yatendeke ukuloka. E fyo ne cilala capwile. Ahabu alibutwishe iceleta lyakwe. Yehova alyafwile Eliya ukubutuka sana ica kuti ailecila ne celeta lya kwa Ahabu! Bushe amafya ya kwa Eliya epo yapwilile apa pene? Natumone.