Chipwe ngwe wanangana wa minyachi kumi ya Izalele wapwile ni kulinga yuma yinji yipi, alioze Ahabe kapwile umwe wa kuli waze alingile yuma yipi kuhiana. Iye kalimbachile ni pwo mupi yoze te wakuwayila Mbale. Jina lienyi te Jezebele. Ahabe ni Jezebele, yazalisa chifuchi ni uwayilo wa Mbale ni kushiha aprofeta ja Yehova. Mba yika Yehova alingile? Iye yatuma profeta Eliya hanga atwalile Ahabe jimwe sango.

Eliya yalweza Mwanangana Ahabe ngwenyi, mumu lia upi wenyi, mu Izalele te kumuchi kunoka vula. Ha miaka yitatu kuhiana, mbuto kuyakakolele, chocho atu yaputuka kufwa zala. Hi kulutwe, Yehova yatuma nawa Eliya kuli Ahabe. Mwanangana yamba ngwenyi: ‘Yena uli mukwa-mbwanja! Yino yeswe yinalingiwa mumu lia yena! Eliya yakumbulula ngwenyi: ‘Hi yami ko ngunanehe changa chacho. Yena mwe wachineha mumu lia kutuma atu hanga awayile Mbale. Mutulinga chimwe cheseko. Sanyika vungu lieswe lia Izalele ni aprofeta eswe a Mbale ha Mulundu wa Karmela.’

Atu yalikungulula ha mulundu. Eliya yamba ngwenyi: ‘Sakulenu. Nyi Yehova iye Zambi wamwenemwene, mukaulenu. Nyi Mbale, mukaulenu. Ngunalingi cheseko chino. Aprofeta a Mbale 450 katamba kululieka mulambu ni kusanyika zambi wo, ni yami mungululieka mulambu ni kusanyika Yehova. Zambi yoze makumbulula ni kahia mwe wamwenemwene.’ Atu yachitayiza.

Aprofeta a Mbale yalulieka mulambu. Ha tangwa lieswe, ayo yasanyika zambi wo ngwo: ‘Mwene Mbale, tukumbulule kama!’ Muze Mbale te keshi kukumbulula, Eliya yaputuka kwaasosomba. Yamba ngwenyi: ‘Nyi muchilita munuhasa kukololoka chikolo. Hanji kanapombo, nawa kanafupiwa umwe hanga amuhindwise.’ Tangwa te linayi ni kutoka, nihindu aprofeta a Mbale yanunga ni kusanyika Mbale. Alioze kakawanyine kumbululo nilimwe.

Eliya yasa mulambu wenyi ha chilumbilo nawa yasaho meya anji. Chocho, yalemba ngwenyi: ‘Mwene Yehova, lisesa solola kuli atu wano anyingike ngwo yena uli Zambi wamwenemwene.’ Hohene, Yehova yatuma kahia kukatuka mu malilu yikwocha mulambu weswe. Atu yakololoka ngwo: ‘Yehova iye Zambi wamwenemwene!’ Eliya yamba ngwenyi: ‘Kanda nwecha ni umwe wa kuli aprofeta a Mbale hanga achine!’ Ha tangwa liacho, kashihile aprofeta a Mbale 450.

Muze kalelwa kakehe kasolokele helu lia kalunga-lwiji, Eliya yalweza Ahabe ngwenyi: ‘Vula munji kaneza. Njila mu temba lie hanga uye ku zuwo.’ Kwilu yikulaa pwi ni malewa, fuji yiyiputuka hamwe ni vula munji. Chocho changa yichihwa. Ahabe yendesa temba lienyi kawashi-washi ni kuya ku zuwo. Ni ukwaso wa Yehova, Eliya yazomboka ni kuhiana temba lia Ahabe! Shina, chino chahwishile milonga yeswe ya Eliya? Tutalenu.