Sa rwayonm dis tribi Izrael ti annan en kantite move lerwa, me Aab ti enn parmi bann ki ti pli move. I ti marye avek en move madanm ki ti ador Baal. Son madanm ti apel Zezabel. Aab ek Zezabel ti fer tou dimoun ador Baal e zot ti touy bann profet Zeova. Ki Zeova ti fer? I ti anvoy profet Eliya pour donn Aab en mesaz.

Eliya ti dir Lerwa Aab ki lapli pa ti pou tonbe dan pei Izrael akoz i ti pe fer bann move keksoz. Pour plis ki trwa-z-an, bann plantasyon pa ti raporte e dimoun ti napa nanryen pour manze. Pli tar, Zeova ti demann Eliya pour retourn kot Aab. Lerwa ti dir: ‘Ou kontan fer problenm! Tousala i gras a ou.’ Eliya ti dir: ‘Pa mwan ki’n fer lapli pa tonbe. Ou ki’n fer sa akoz ou ador Baal. Nou pou fer en tes. Rasanble lepep ek bann profet Baal anler lo Montanny Karmel.’

Bann dimoun ti rasanble lo montanny. Eliya ti dir: ‘Deside zot menm, si Zeova i sa vre Bondye, swiv li. Me si i Baal, alor swiv li. La sa ki zot pou fer. Sa 450 profet Baal i kapab prepar en sakrifis e kriy zot bondye, mwan osi mon pou prepar en sakrifis e kriy Zeova. Sa enn ki reponn par anvoy dife i sa vre Bondye.’ Bann dimoun ti dakor.

Bann profet Baal ti prepar zot sakrifis. Tou dilon lazournen zot ti kriy zot bondye: ‘O Baal, reponn nou!’ Ler Baal pa ti reponn, Eliya ti boufonn zot e dir: ‘Kriy pli for ankor. Petet i’n al dormi e en dimoun i bezwen lev li.’ I ti konmans fernwanr e bann profet Baal ti kontinyen kriye menm. Me kantmenm sa, i ti napa larepons.

Eliya ti met son sakrifis lo lotel e i ti vid delo partou lo la. Apre i ti priye: ‘O Zeova, silvouple fer bann dimoun konnen ki ou sa vre Bondye.’ Deswit Zeova ti fer dife sorti dan lesyel bril sa sakrifis. Bann dimoun  ti kriye: ‘Zeova i sa vre Bondye!’ Eliya ti dir: ‘Pa les bann profet Baal sove!’ Sa zour, 450 profet Baal ti ganny touye.

Pli tar ler en pti nyaz ti aparet lo lanmer, Eliya ti dir Aab: ‘I pou annan en tanpet. Mont lo ou saret e al kot ou.’ Letan ti anmase, divan ti soufle e en gro lapli ti konmans devide. Alafendefen, sa lasesres ti fini. Aab ti fer son saret al pli vit posib. Avek led Zeova, Eliya ti tay pli vit ki sa saret. Me eski tou problenm Eliya ti fini la? Annou gete.