E levu na tui ca ena tini na yavusa ni matanitu o Isireli, e ca duadua o Eapi. A vakawatitaka e dua na marama ca dau qaravi Peali, na yacana o Jesepeli. Rau uqeta na qaravi matakau ena vanua, rau vakamatei ira tale ga na parofita i Jiova. Na cava e qai cakava o Jiova? E tala na parofita o Ilaija me tukuna vei Eapi na nona itukutuku.

E kaya o Ilaija vei Tui Eapi ni na sega ni tau na uca e Isireli ena vuku ni nona itovo ca. E sega ni tubu na nodra itei me sivia e tolu na yabaki, era viakana tale ga na Isireli. E qai talai Ilaija tale o Jiova vei Eapi. E kaya na tui: ‘O iko ga o vakavuna tiko na leqa! E bale vei iko.’ E kaya o Ilaija: ‘Au sega ni vakavuna na lauqa. O kemuni ga oni vakavuna ni oni qaravi Peali. Ke da via kila se o cei na Kalou dina, moni kacivi ira yani na Isireli kei ira na parofita i Peali e Ulu i Kameli.’

Era lako sara na Isireli ina ulunivanua. E kaya o Ilaija: ‘Moni kua ni lomalomarua. Ke Kalou dina o Jiova, moni muri koya. Ke o Peali, ni muri koya. Qo na ka me caka. Mera vakarautaka na 450 na parofita i Peali na nodra isoro, mera masuta na nodra kalou. Au na vakarautaka tale ga e dua na isoro qai masuti Jiova. O koya e sauma mai ena bukawaqa, ya e Kalou dina.’ Era mani vakadonuya.

Era qai vakarautaka na parofita i Peali na nodra isoro. Era masuta na nodra kalou ena siga taucoko: “Kemuni Peali, ni rogoci keimami!” Ni sega ni rogo mai, e vakalialiai koya o Ilaija ni kaya: ‘Ni kaci vakadomoilevu de moce tu, me vakayadrati mada.’ Ni sa yakavi, era se kaci ga na parofita i Peali. E sega ni rogo mai.

E biuta sara o Ilaija na nona isoro ena kena icabocabo qai sova e delana na wai. E masuta: ‘Kemuni Jiova, au kerea mera kila o ira qo ni oni Kalou dina.’ Sega ni bera ni lutu mai lomalagi na bukawaqa i Jiova qai yameca na isoro. Era kailavaka: “O Jiova ga na Kalou dina!” E kaya o  Ilaija: ‘Me kua ni dro e dua na parofita i Peali!’ Era vakamatei ena siga qori e 450 na nona parofita.

Ni laurai e dua na o lailai mai wasawasa, e kaya vei Eapi o Ilaija: ‘Sa voleka na uca. Ni vakarautaka nomuni qiqi, moni lako i vale.’ E loaloa na lomalagi ena levu ni o, liwa na cagi qai tau bi na uca. Sa oti na lauqa. E vodo o Eapi ena nona qiqi me vakatotolo yani. Ena veivuke i Jiova, e cici vakatotolo o Ilaija qai sivita na qiqi! Vakacava, sa oti kece na leqa nei Ilaija? Meda raica mada.