A bati ueea aika buakaka n te tautaeka n uea ni baronga ake tebwina ae Iteraera, ma te kabanea ni buakaka i buakoia bon Aaba. E mare teuaei ma te aine ae buakaka ae taromauria Baara. Aran neiei bon Ietebera. A kabutanakoa taromauriani Baara Aaba ma Ietebera ao a kamateia ana burabeti Iehova. Tera ae e karaoia Iehova? E kanakoa te burabeti ae Eria bwa e na karokoa te rongorongo iroun Aaba.

E tuanga te Uea ae Aaba Eria bwa e nang akea te karau i Iteraera ibukini buakakana. A aikoa rikirake aroka i nanon tenua tabun te ririki ao a a baki aomata. Imwina riki ao Iehova e a manga kanakoa Eria nakon Aaba. E taku te uea aei: ‘Ko karokoa te kangaanga! Ko na bukinaki iai.’ E taku Eria: ‘Tiaki ngai ae I karokoa te mwautakataka. Boni ngkoe ibukina bwa ko taromauria Baara. Ti na kakaaea bwa antai te Atua ae koaua. Botiia aomata ao ana burabeti Baara i taubukin te Maunga ae Karemera.’

A a botaki aomata n te maunga ao e taku Eria: ‘Motiki ami iango. Ngkana Iehova bon te Atua ae koaua ao iria, ma ngkana Baara ao iria. I karaoa te kakaewenako aei. A na katauraoa te karea ana burabeti Baara aika 450 ao a na wetea atuaia, ao ngai N na katauraoa te karea ao ni wetea Iehova. Ane e kaekaa te wewete ni kabwakaa te ai ao boni ngaia te Atua ae koaua.’ Ao a bane aomata ni kariaia.

Ngaia are a a katauraoa aia karea ana burabeti Baara. A wetea atuaia ni karokoa ae bong ni kangai: ‘Baara, kaekaira!’ Ngke e aki kaekaeka Baara, e a kakanikoaki iroun Eria. E taku: ‘Kabanei takaruami. Tao e matunako, ao e kainnanoa kautana.’ Ngke e a tairiki, ao a teimatoa ana burabeti Baara ni wewete. Ma bon akea naba te kaeka.

E a katokaa ngkanne ana karea Eria i aon te baonikarea ao e kabwaroa te ran i aona. Imwina e tataro ni kangai: ‘Iehova, taiaoka ma kaotia nakoia aomata aikai bwa bon te Atua ae koaua ngkoe.’ E a rina naba ni kabwakaa te ai mai karawa Iehova ao e kabueka te karea. Ao a takarua aomata ni  kangai: ‘Bon Iehova te Atua ae koaua!’ E taku Eria: ‘Tai kariaia bwa a na birinako ana burabeti Baara!’ A tiringaki n te bong anne 450 ana burabeti Baara.

Ngke e kaoti te nang ae uarereke i aon taari ao e taku Eria nakon Aaba: ‘E nang roko te buaka. Katauraoa am kaa ni buaka ao naako oki nakoni mwengam.’ E a roo ngkanne karawa n taian nang, e kare te ang, ao e a bwaka te karau ae korakora. Ao e a toki te mwautakataka. E kabanea butin ana kaa ni buaka Aaba, ma e birimwaaka riki Eria nakon te kaa ni buaka man ana ibuobuoki Iehova! A a bane n toki ngkai ana kangaanga Eria? Ti na noria.