Im Königriich Israel, das isch das mit de 10 Stämm, hets scho vil schlechti Könige gee. Aber de König Ahab, wo jetzt regiert, isch eine vo de schlimmschte. Er hüratet di bösi Frau Isebel. Si betet de falsch Gott Baal a. De Ahab und d Isebel mached, dass es normal wird, dass d Lüt im ganze Land de Baal abeted und si bringed au Prophete vo Jehova um. Was macht Jehova jetzt? Er schickt de Prophet Elia mitere Nachricht zum Ahab.

De Elia seit em König Ahab, dass es z Israel nüm wird cho regne, wil de Ahab eso bös isch. Und genau eso chunnts: Meh als drü Jahr lang regnets nid. Wege dem vertröchned d Felder und d Mensche hend nüt meh z esse. Denn schickt Jehova de Elia wider zum König Ahab. Da seit de Ahab zum Elia: «Wege dir passiert das alles, du bisch schuld!» De Elia git zur Antwort: «Das stimmt nid. Es isch dini Schuld. D Mensche müend Hunger ha, wil du de Baal abetisch. Chumm, mir mached en Tescht und lueged, wer de wahr Gott isch. Für das sölled s Volk und em Baal sini Prophete uf de Berg Karmel cho.»

Da göhnd alli uf de Berg ufe und dört seit de Elia zu ihne: «Ihr müend euch entscheide. Wenn Jehova de wahr Gott isch, denn diened ihm. Wenn aber de Baal de wahr Gott isch, de tüend euch für ihn entscheide. Mir mached jetzt en Tescht: Di 450 Prophete vom Baal sölled es Opfer vorbereite und nachher zu ihrem Gott bete. Au ich tue es Opfer vorbereite und tue zu Jehova bete. De Gott, wo s Opfer mit Füür verbrennt, de isch de wahr Gott.» S Volk isch iiverstande.

Da tüend d Prophete vom Baal ihres Opfer vorbereite und rüefed de ganz Tag: «O Baal, los uf üs!» Aber es passiert gar nüt. De Elia macht sich über de Baal luschtig und seit: «Rüefed eso luut wie ihr chönnd. Vilicht schlaft ja de Baal und ihr müend ihn wecke.» Wos Abig wird, sind d Prophete immer no am Rüefe, aber de Baal git kei Antwort.

Jetzt leit de Elia sis Opfer uf de Altar und laat sogar no Wasser drüber leere. Er betet und seit: «O Jehova, bitte zeig em Volk, dass du de wahr Gott bisch.» Sofort macht Jehova, dass es Füür vom Himmel chunnt und s Opfer vom Elia verbrennt. Da rüeft s Volk: «Jehova isch de wahr Gott!» De Elia befihlt: «D Prophete vom Baal dörfed ja nid devocho!» No am gliiche Tag werded di 450 falsche Prophete tötet.

Später taucht e chliini Wolke über em Meer uf. De Elia laat em Ahab säge: «Glii chunnts cho regne. Schnell, gang uf din Wage und fahr hei.» Denn wird de Himmel schwarz, es fangt a winde, und nachher chunnts richtig fescht cho regne. Endlich isch d Ziit verbii, wo alles troche isch! De Ahab fahrt jetzt mit sim Wage eso schnell wie er cha. De Elia springt au los und, mit de Hilf vo Jehova, isch er sogar schneller als de Ahab. Aber isch jetzt bim Elia eifach alles guet? Das werded mir no gseh.