Ahọlu ylankan susu wẹ dugán do ahọluduta hẹnnu ao Islaeli tọn ji, ṣigba dopo to dehe ylan hugan lẹ mẹ wẹ Ahabi. E dà yọnnu ylankan de he nọ sẹ̀n Baali. Yinkọ etọn wẹ Jezebẹli. Ahabi po Jezebẹli po hẹn sinsẹ̀n-bibasi Baali tọn gbayipe to aigba lọ ji bo hù yẹwhegán Jehovah tọn lẹ. Etẹwẹ Jehovah wà? E do yẹwhegán Elija hlan nado dowẹn de Ahabi.

Elija dọna Ahọlu Ahabi dọ, na kanyinylan etọn wutu jikun depope ma na ja to Islaeli. Na owhe atọ̀n linlán, jinukun lẹ ma whẹ́n bọ huvẹ jẹ gbẹtọ lẹ hù ji. To godo mẹ, Jehovah gọ̀ Elija dohlan Ahabi dè. Ahọlu lọ dọmọ: ‘Tukla hẹnwatọ de wẹ a yin! Hiẹ wẹ zọ́n bọ onú ehe lẹpo do to jijọ.’ Elija gblọn dọmọ: ‘E ma yin yẹn wẹ hẹn akúdido ehe wá. Baali sinsẹ̀n towe wẹ hẹn ẹn wá. Gbọ mí ni basi tẹnpọn de. Pli akọta lọ po yẹwhegán Baali tọn lẹ po do Osó Kalmẹli ji.’

Gbẹtọ lọ lẹ sọ pli do osó lọ ji. Elija dọmọ: ‘Mì basi nudide dopo. Eyin Jehovah wẹ Jiwheyẹwhe nugbo lọ, mì hodo e. Eyin Baali sọ wẹ, mì bo hodo e. Mì gbọ mí ni basi tẹnpọn de. Yẹwhegán Baali tọn 450 lẹ ni wleawuna avọ́nunina de bo ylọ yẹwhe yetọn, yẹnlọsu nasọ wleawuna avọ́nunina de bo ylọ Jehovah. Yẹwhe he na gblọndo gbọn miyọ́n didohlan dali wẹ yin Jiwheyẹwhe nugbo lọ.’ Gbẹtọ lọ lẹ sọ yigbe.

Yẹwhegán Baali tọn lẹ wleawuna avọ́nunina de. Yé yí azán lọ blebu do to awhádo ylọ yẹwhe yetọn dọmọ: ‘Baali E, siọ mí!’ Baali ma siọ yé, enẹwutu Elija jẹ ṣinṣàn ẹn kò ji dọmọ: ‘Mì yí ogbè lélé do dawhá bo. Vlavo amlọndọ wẹ e te bọ mẹde dona fọ́n ẹn.’ Yẹwhegán Baali tọn lọ lẹ to awhádo ylọ ẹ kakajẹ whèjai. Ṣigba, mẹde ma siọ yé.

Todin, Elija ze avọ́nunina etọn do agbà de ji bo kọ̀n osin do e ji. Enẹgodo, e hodẹ̀ dọmọ: ‘Jehovah E, jaale gbọ gbẹtọ lọ lẹ ni yọnẹn dọ hiẹ wẹ Jiwheyẹwhe nugbo lọ.’ To afọdopolọji, Jehovah do miyọ́n hlan sọn olọn mẹ bọ e fiọ avọ́nunina lọ. Gbẹtọ lọ lẹ sọ dawhá dọmọ: ‘Jehovah wẹ Jiwheyẹwhe nugbo lọ!’ Elija dọmọ: ‘Mì ma dike yẹwhegán Baali tọn lẹ  ni họ̀ngán blo!’ To gbenẹgbe, yẹwhegán Baali tọn 450 lọ lẹ yin hùhù.

To whenue aslọ pẹvi de sọawuhia to ohù ji, Elija dọna Ahabi dọmọ: ‘Jikun daho de jlo na ja. Wleawuna osọ́-kẹkẹ towe bo dedo whé.’ Agahomẹ sọ sú pete bọ jẹhọn jẹ yìnyìn ji, enẹgodo jikun daho de bẹ. Akúdido lọ doalọte lo. Ahabi kùn osọ́-kẹkẹ etọn po awuyiya po dile e penugo do. Amọ́ po alọgọ Jehovah tọn po, Elija họ̀nwezun zẹ̀ osọ́-kẹkẹ lọ go! Ṣigba, be nuhahun Elija tọn lẹpo ko fó do finẹ wẹ ya? Gbọ mí ni pọ́n.