Omihoko omurongo vyouhona waIsrael vya kara novanane ovengi ovavi posiya Ahab ongwa ri omuvimuvi. Eye wa kupire omukazendu omurunde ngee rikotamene ku Baal. Ena re wa ri Isebel. Ahab na Isebel ve urisire ehi nomerikotameneno waBaal nu va zepa ovaprofete vaJehova. Jehova wa tjita vi? Eye wa hinda omuprofete Elia okuyandja ombuze ku Ahab.

Elia wa raera Ombara Ahab kutja ombura kaina okuroka moIsrael mena rouvi we. Mozombura ndatu kamwari ovikurya, novandu va ṱire ondjara. Jehova kombunda wa hinda Elia ku Ahab rukwao. Ombara ya tja: ‘Oove omutjite woumba! Avihe mbi ondjo yoye.’ Elia wa zira na tja: ‘Kawami ngu mba eta ourumbu. Oove ngwa tjita nao mokurikotamena ku Baal. Ngatu tare kutja ouṋe ngu ri nawa. Woronganisa otjiwaṋa atjihe novaprofete vaBaal kOndundu yaKarmel.’

Ovandu va woronganena kondundu. Elia wa tja: ‘Mamu ripura pevari nga ruṋe? Jehova tje ri Mukuru watjiri, rikotameneye ku ye. Nu Baal tje ri mukuru watjiri, rikotameneye ku ye. Ami me vanga kutja tu tjite nai: Ovaprofete vaBaal 450 mave sokurongerisa ombunguhiro nave isana mukuru wawo, nami wina me rongerisa ombunguhiro ne isana Jehova. Ingwi ngu ma ziri nomuriro ongu ri Mukuru watjiri.’ Ovandu va itavera kutja mave tjiti nao.

Ovaprofete vaBaal va rongerisa ombunguhiro. Eyuva arihe owo va ravaera ku mukuru wawo nave tja: “Tu zuvira, Baal!” Indu Baal tje hina we ve zira Elia wa uta okuvetjita ouhahu. Eye wa tja: ‘Ravaereye nomasa ngahino wa rara ma hepa okupendurwa.’ Ouṱuku weya, nu ovaprofete vaBaal va kayenda komurungu okuisana. Posiya Baal kena pe ve zira.

Elia wa twa ombunguhiro ye potjipunguhiro na tirire omeva kombanda ya tjo. Nu tjazumbo wa kumba na tja: ‘Arikana Jehova, ovandu mba ngave tjiwe kutja oove Mukuru watjiri.’ Nu tjimanga Jehova wa hinda omuriro okuza keyuru okuningiririsa ombunguhiro. Ovandu va ravaera nave tja: ‘Jehova oMukuru wa tjiri!’ Elia wa tja:  “kambureye ovaprofete vaBaal; amu isa umwe a poṋe.” Eyuva ndo, ovaprofete 450 vaBaal va zepewa.

Indu okakamba okaṱiṱi tji ka uta okumunika mokuvare, Elia wa raera Ahab a tja: ‘Ronda metemba roye nu u yende konganda ombura mai ya.’ Eyuru ra uta okuzozera, ombepo ya vinga nu ombura ya uta okuroka tjinene. Korusenina, ourumbu wa yanda. Ahab wa hinga etemba re nomasa tjinene. Nombatero yaJehova, Elia wa tupuka tjinene nga tja yenena okukapita etemba raAhab! Nu hapo omauzeu waElia aehe ya yanda? Indjo tu tare.