Adu ti dakes nga ari a nagturay iti sangapulo a tribu a pagarian ti Israel, ngem ni Acab ti maysa kadagiti kadadaksan. Nangasawa iti nakadakdakes a babai nga agdaydayaw ken Baal nga agnagan Jezebel. Indauluanda ti panagdayaw ken Baal ket pinapatayda dagiti propeta ni Jehova. Ania ti inaramid ni Jehova? Imbaonna ni propeta Elias a mangibaga iti mensahena ken Acab.

Imbaga ni Elias ken Ari Acab a gapu iti kinadakesna, saanto nga agtudo iti Israel. Nasurok a tallo a tawen nga awan ti nagtubo a mula ket nagbisin dagiti tattao. Idi agangay, imbaon manen ni Jehova ni Elias ken Acab. Imbaga ti ari: ‘Sika ti makagapu kadagiti dakes a mapaspasamak! Basolmo daytoy.’ Insungbat ni Elias: ‘Sika ti makagapu nga awan tudo, saan a siak. Nagdaydayawka ngamin ken Baal. Mangaramidtayo iti pannubok. Ummongem dagiti tattao ken dagiti propeta ni Baal iti tuktok ti Bantay Carmelo.’

Naguummong dagiti tattao iti bantay. Imbaga ni Elias: ‘Agdesisionkayon. No ni Jehova ti pudno a Dios, sumurotkayo kenkuana. Ngem no ni Baal, isu ti surotenyo. Daytoy ti aramidentayo. Mangisagana iti daton ti 450 a propeta ni Baal ket umawagda iti diosda. Mangisaganaak met iti daton ket umawagak ken Jehova. Ti sumungbat babaen iti apuy isu ti pudno a Dios.’ Kinayat dagiti tattao ti imbagana.

Nangisagana dagiti propeta ni Baal iti daton. Nagmalmalem nga immawagda iti diosda: ‘O Baal, sungbatannakami!’ Idi saan a simmungbat ni Baal, pinagang-angawan ni Elias. Imbagana: ‘Awaganyo iti kapigsaan a bosesyo. Baka nakaturog ket kasapulan nga adda mangriing kenkuana.’ Nagtultuloy nga immawag dagiti propeta ni Baal agingga iti rabii. Ngem awan sumungsungbat.

Inkabil ni Elias ti datonna iti altar ket binukbokanna iti danum. Inkararagna: ‘O Jehova, pangngaasim, sungbatannak tapno maammuan dagiti tattao a sika ti pudno a Dios.’ Dagus a nangitinnag ni Jehova iti apuy a nangpuor iti daton. Impukkaw dagiti tattao: ‘Ni Jehova ti  pudno a Dios!’ Imbaga ni Elias: ‘Diyo ipalubos a makalibas dagiti propeta ni Baal!’ Iti dayta nga aldaw, napapatay ti 450 a propeta ni Baal.

Idi kuan, adda nagparang a bassit nga ulep iti baybay ket imbaga ni Elias ken Acab: ‘Adda um-umay a napigsa a tudo. Isaganam ti karuahem, ket agawidka.’ Simmipnget ti langit gapu kadagiti ulep, nagangin, ket nagtudo iti napigsa. Nagpatinggan ti tikag. Pinataray ni Acab ti karuahena iti nakaparpartak. Iti tulong ni Jehova, nagtaray ni Elias a naparpartak ngem iti karuahe! Ngem nalpas kadin dagiti problema ni Elias? Kitaenta.