Israela amyu lakung 10 mungdan hta, n kaja ai hkawhkam law law uphkang wa ai. Dai hta, Hkawhkam Ahab gaw sawng dik htum re. Shi gaw Yezebela ngu ai anum langai hte hkungran da ai. Yezebela gaw Bala hpara hpe nawku nna grai n kaja ai anum langai re. Ahab hte Yezebela gaw, mungdan ting Bala hpe nawku wa hkra galaw nna, Yehowa a myihtoi ni hpe mung sat kau ai. Yehowa gara hku galaw wa ai kun? Yehowa gaw myihtoi Elia hpe Ahab hpang shiga sa tsun shangun ai.

Elia gaw Hkawhkam Ahab hpe: ‘Nang grai n hkru ai majaw, Israela mung hta marang htu na n re’ nga nna sa tsun ai. Masum ning jan marang n htu ai majaw, nai mam ni mung n byin ai. Dai majaw, masha ni gaw grai kawsi hpang gara hkrum wa ma ai. Yehowa gaw Elia hpe Ahab hpang de kalang bai sa shangun ai. Ahab ndai hku tsun ai: ‘Nang gaw manghkang re! Ndai ni yawng na a majaw re.’ Elia ndai hku bai tsun ai: ‘Jan gri ai gaw ngai na majaw n re. Nang Bala hpe nawku ai majaw re. Kadai gaw teng man ai Karai re ai hpe anhte chyam yu ga. Mung masha ni hte Bala myihtoi ni hpe Hkarmela Bum ntsa de sa wa shangun dat u.’

Masha ni gaw bum ntsa kaw zup hpawng ma ai. Elia ndai hku tsun ai: ‘Nanhte a myit hpe shajin da mu. Lama na, Yehowa gaw teng man ai Karai Kasang rai yang, Yehowa hpe nawku mu. Lama na, Bala rai yang Bala hpe nawku mu. Ndai hku galaw chyam yu ga. Bala myihtoi 450 gaw, shagu hkungga hkyen lajang nna Bala hpe shaga u. Ngai mung shagu hkungga hkyen lajang nna, Yehowa hpe shaga na. Wan hte bai mahtai jaw ai Karai gaw teng man ai Karai Kasang re.’ Masha ni mung dai hku galaw na matu myit hkrum ma ai.

Bala myihtoi ni gaw shagu hkungga hpe hkyen lajang ma ai. ‘Bala e, anhte hpe mahtai jaw rit’ nga nna shanhte a hpara hpe shani tup shaga ma ai. Bala gaw bai mahtai n jaw ai majaw, Elia gaw shanhte hpe jahpoi asawng ai. Shi ndai hku tsun ai: ‘Nanhte kam ai daram marawn dat u. Shi yup pyaw nga sam ai. Langai ngai shi hpe sa jasu ra na re.’ Shana maga du wa tim, Bala myihtoi ni gaw matut shaga nga ding yang re. Raitim, mahtai gaw n lu ai.

Elia gaw tawn hkungri ntsa shi a shagu hkungga hpe mara nna, dai yawng a ntsa hta hka pyi naw jaw dat ai. Dai hpang, shi ndai hku akyu hpyi ai: ‘Yehowa e, nang gaw teng man ai Karai Kasang re ai hpe masha ni chye wa hkra chyeju hte madun ya  rit.’ Yehowa gaw kalang ta, lamu kaw nna wan jahkrat ya let hkungga hpe nat kau ya ai. Dai shaloi, ‘Yehowa gaw teng man ai Karai Kasang re!’ nga nna masha ni marawn jahtau ma ai. Elia shanhte hpe ndai hku tsun ai: ‘Bala myihtoi langai mi hpe mung hkum shalawt ya u!’ Dai shani hta, Bala myihtoi 450 gaw sat kau hkrum ai.

Panglai ntsa summwi kaji hpe mu ai shaloi, Elia gaw Ahab hpe ndai hku tsun ai: ‘Nbung laru sa wa sai. Na a gumra leng jawn nna nta de wa su.’ Lamu gaw summwi ni hte sin mak wa nna, nbung ni bung wa ai hte marang kaba htu hkrat wa ai. Hpang jahtum, jan gri ai lam htum mat sai. Ahab gaw shi a leng hpe grai lawan hkra gawt nna wa mat ai. Elia gaw Yehowa a karum shingtau lam a majaw, dai gumra leng hta grau nna lu kagat ai. Elia hta manghkang ni n nga mat sai kun? Yu yu ga.