Saʼ li xʼawabʼejilal li 10 chi teep re Israel kiwank naabʼal li awabʼej li maaʼusebʼ xnaʼlebʼ, abʼan laj Acab jwal xnumtaak wiʼ chik kixbʼaanu. Kisumlaak rikʼin jun li ixq maaʼus xnaʼlebʼ li naxloqʼoni li yos Baal. Aʼan li xJezabel. Laj Acab ut li xJezabel keʼxbʼaanu naq naabʼalebʼ teʼxloqʼoni laj Baal. Keʼxkamsi ajwiʼ naabʼal xpropeet li Jehobʼa. Kʼaru kixbʼaanu li Jehobʼa? Kixtaqla li propeet Elias re xkʼebʼal jun li esil re laj Acab.

Laj Elias kixye re laj Acab naq inkʼaʼ tchalq li habʼ xbʼaan naq maaʼus xnaʼlebʼ. Naxqʼax oxibʼ chihabʼ naq maakʼaʼ kimoq saʼ chʼochʼ, ut ebʼ li poyanam numtajenaq xtzʼokajikebʼ. Chirix chik aʼan, li Jehobʼa kixtaqla wiʼ chik laj Elias chi aatinak rikʼin laj Acab. Li awabʼej Acab kixye re laj Elias: «Junes chʼaʼajkilal nakaakʼam chaq. Chixjunil aʼin saʼ aakʼabʼaʼ». Laj Elias kixsume: «Moko laaʼin ta wank we naq inkʼaʼ nachalk li habʼ. Wank li chaqiʼe xbʼaan naq nakaaloqʼoni laj Baal. Chʼutubʼ li tenamit ut ebʼ li xpropeet laj Baal saʼ xtaqeʼqil li tzuul Carmelo. Ut tqil ani li tzʼaqal Yos».

Li tenamit kichʼutlaak, tojaʼ naq laj Elias kixye rehebʼ: «Tento teekʼoxla rix. Wi li Jehobʼa aʼan li tzʼaqal Yos, tqehomaq. Abʼan wi laj Baal, tqehomaq aʼan. Qilaq ani li tzʼaqal Yos: li 450 li xpropeet laj Baal tixkʼubʼ jun li mayej ut tixbʼoq li xyos. Laaʼin ajwiʼ tinkʼubʼ jun li mayej ut tinbʼoq li Jehobʼa. Li yos li tsumenq chaq rikʼin xaml aʼan li tzʼaqal Yos». Li tenamit kixkʼulubʼa.

Tojaʼ naq, ebʼ li xpropeet laj Baal keʼxkʼubʼ xmayej. Chalen eqʼla toj ewu keʼxbʼoq li xyos: «At Baal, chooʼaasume!». Abʼan saʼ xkʼabʼaʼ naq laj Baal inkʼaʼ nasumenk chaq, laj Elias kiʼok xseʼenkil ut kixye rehebʼ: «Japomaq eere chi kaw. Maare yook chi wark ut naraj naq teerajsi chaq». Kiʼok chi qʼoqyinoʼk, ut ebʼ li xpropeet laj Baal inkʼaʼ keʼxkanabʼ xbʼoqbʼal, abʼan maaʼani xsumenk rehebʼ.

Laj Elias kixkʼe li xmayej saʼ xbʼeen jun li altar ut kixkʼe naabʼal haʼ saʼ xbʼeen. Chirix chik aʼan kitijok: «At Jehobʼa, rilaq li tenamit naq laaʼat li tzʼaqal Yos». Saʼ junpaat li Jehobʼa kirisi chaq xaml saʼ choxa re xkʼatbʼal li mayej. Ebʼ li poyanam keʼxjap re: «Li Jehobʼa aʼan li tzʼaqal Yos!».  Anaqwan laj Elias kixye: «Meekanabʼ chi elelik maajun rehebʼ li xpropeet laj Baal». Saʼ li kutan ajwiʼ aʼan, keʼxkamsi li 450 li xpropeet laj Baal.

Moqon chik, kixkʼut ribʼ jun li chʼina choql saʼ xbʼeen li palaw, ut laj Elias kixye re laj Acab: «Chalk re li kawil habʼ. Chap laabʼelebʼaal chʼiichʼ ut ayu saʼ laawochoch». Li choxa kinujak chi qʼeqi choql, kiʼapunk chaq li iqʼ, ut kichalk li kawil habʼ. Tojaʼ naq, kiraqeʼk li chaqiʼe. Laj Acab xkoho saʼ junpaat saʼ li xbʼelebʼaal chʼiichʼ. Li Jehobʼa kixtenqʼa laj Elias chi aanilak chi kaw chiru li bʼelebʼaal chʼiichʼ. Abʼan ma xraqeʼk chixjunil li xchʼaʼajkilal laj Elias? Qilaq.