Kimfumu ya makanda kumi ya Izraele vandaka ti bantotila mingi ya mbi, kansi Ahabi vandaka mbi kuluta bo yonso. Yandi kwelaka nkento mosi ya mbi yina vandaka kusambila Baale. Zina na yandi Yezabele. Ahabi ti Yezabele fulusaka insi ti lusambu ya Baale mpi fwaka baprofete ya Yehowa. Yehowa salaka nki? Yandi tindaka profete Eliya sambu na kupesa Ahabi nsangu mosi.

Eliya songaka ntotila Ahabi nde sambu na mambi na yandi, mvula ta noka ve na Izraele. Na nsungi ya bamvula kuluta tatu, bimenina yelaka ve mpi bantu vandaka na nzala. Ebuna Yehowa tindaka diaka Eliya na Ahabi. Ntotila tubaka: ‘Nge kele muntu ya ke kotisaka mavwanga! Mambu yai yonso kele foti na nge.’ Eliya vutulaka nde: ‘Mono ve muntu me nata nsungi yai ya kuyuma. Nge muntu me nata yo sambu nge sambilaka Baale. Beto ta mekana. Vukisa dikanda mpi baprofete ya Baale na zulu ya Ngumba ya Karmele.’

Bantu vukanaka na ngumba yina. Eliya tubaka nde: ‘Yindula mbote. Kana Yehowa kele Nzambi ya kieleka, landa yandi. Kana yo kele Baale, landa yandi. Mono ke meka beno na diambu yai. Baprofete 450 ya Baale fwete yidika kimenga mpi kubinga nzambi na bo, ebuna mono ta yidika kimenga mpi ta binga Yehowa. Muntu yina ta pesa mvutu na tiya, yandi muntu kele Nzambi ya kieleka.’ Bantu ndimaka diambu yina.

Baprofete ya Baale yidikaka kimenga. Bo bingaka nzambi na bo kilumbu ya mvimba nde: ‘O Baale, pesa beto mvutu!’ Ntangu Baale vandaka kupesa ve mvutu, Eliya vandaka kuseka bo. Yandi tubaka nde: ‘Beno binga ngolo kibeni. Mbala ya nkaka yandi ke lala, mpi yo ke lomba nde muntu kutedimisa yandi.’ Nkokila bwaka, mpi baprofete ya Baale vandaka kaka kubinga. Kansi, mvutu vandaka kaka ve.

Eliya tulaka kimenga na yandi na zulu ya mesa-kimenga mpi yandi losaka masa na zulu na yo. Ebuna yandi sambaka nde: ‘O Yehowa, pardo, bika bantu kuzaba nde nge kele Nzambi ya kieleka.’ Na mbala mosi, Yehowa tindaka tiya katuka na zulu sambu na kuyoka kimenga yina. Bantu  tubaka na ndinga ya ngolo nde: ‘Yehowa kele Nzambi ya kieleka!’ Eliya tubaka nde: ‘Beno bika ve nde baprofete ya Baale kutina!’ Kilumbu yina, bo fwaka baprofete ya Baale 450.

Ntangu ka dituti monanaka na zulu ya nzadi-mungwa, Eliya songaka Ahabi nde: ‘Mvula ya ngolo ke kwisa. Yidika pusu-pusu na nge, mpi kwenda na nzo.’ Matuti kumisaka zulu ndombe, mupepe bulaka, mpi mvula ya ngolo yantikaka kunoka. Nsuka-nsuka, nsungi ya kuyuma manaka. Ahabi tambusaka pusu-pusu na yandi ntinu kibeni. Ti lusadisu ya Yehowa, Eliya bakaka ntinu kuluta pusu-pusu yina! Kansi, keti bampasi ya Eliya manaka? Bika beto tala.