Ũthamaki wa mĩhĩrĩga ikũmi ya Isiraeli warĩ na athamaki aingĩ oru, no Ahabu nĩwe warĩ mũũru makĩria. Aahikirie mũtumia mwaganu wetagwo Jezebeli, na aathathayagia Baali. Ahabu na Jezebeli nĩ maiyũririe ũthathaiya wa Baali kũndũ guothe na makĩũraga anabii a Jehova. Jehova eekire atĩa? Aatũmire mũnabii Elija atwarĩre Ahabu ndũmĩrĩri.

Elija eerire Mũthamaki Ahabu atĩ tondũ nĩ eekaga maũndũ moru mũno, gũtingĩoirire mbura Isiraeli. Kwa ihinda rĩa makĩria ma mĩaka ĩtatũ, gũtiakũrire kĩndũ bũrũri-inĩ ũcio, na andũ nĩ maagĩire na ng’aragu mũno. Jehova nĩ aatũmire Elija kũrĩ Ahabu rĩngĩ. Ahabu aamwĩrire ũũ: ‘Wee nĩwe ũrehete thĩna gũkũ! Maya mothe nĩ mahĩtia maku.’ Nake Elija akĩmwĩra: ‘Ti niĩ ndũmĩte kũgĩe na ng’aragu. Wee nĩwe ũtũmĩte nĩ ũndũ wa kũhoyaga Baali. Reke tũgerie tuone Ngai wa ma nũ. Cokanĩrĩria andũ othe o hamwe na anabii a Baali gacũmbĩrĩ-inĩ ga Kĩrĩma gĩa Karimeli.’

Andũ nĩ maacemanirie kĩrĩma-inĩ kĩu, na Elija akĩmeera ũũ: ‘Ngwenda mũtue itua rĩu. Angĩkorũo Jehova nĩwe Ngai ũrĩa wa ma, mũrũmĩrĩrei. Na angĩkorũo nĩ Baali, mũrũmĩrĩrei. Ũũ nĩguo tũgwĩka. Anabii 450 a Baali nĩ mahaarĩrie igongona na mete ngai wao, na niĩ nĩ ngũhaarĩria igongona na njĩte Jehova. Ũrĩa ũgũcina igongona na mwaki nĩwe Ngai wa ma.’ Na andũ makĩiguithanĩria.

Anabii a Baali nĩ mahaarĩirie igongona rĩao. Maatindire magĩta ngai wao mũthenya wothe makiugaga ũũ: ‘Baali, tũthikĩrĩrie!’ Baali aaga kũmaigua, Elija aambĩrĩirie kũmanyũrũria. Aameraga ũũ: ‘Mwĩtei na mũgambo mũnene. No gũkorũo nĩ akomire na nĩ arabatara mũndũ wa kũmũũkĩria.’ Gwakinyire hwaĩ-inĩ anabii a Baali makĩmwĩtaga, no ndamaiguaga.

Elija nĩ aaigĩrĩire igongona rĩake kĩgongona-inĩ na akĩrĩitĩrĩria maĩ kũndũ guothe. Aacokire akĩhoya ũũ: ‘Jehova, ndagũthaitha ũreke andũ aya mamenye atĩ wee nĩwe Ngai ũrĩa wa ma.’ Jehova nĩ aatũmire mwaki kuuma na igũrũ o  hĩndĩ ĩyo, na ũgĩcina igongona rĩu. Andũ maanĩrĩire makiugaga: ‘Jehova nĩwe Ngai ũrĩa wa ma!’ Nake Elija akiuga ũũ: ‘Mũtikareke mũnabii o na ũmwe wa Baali ore!’ Mũthenya ũcio, anabii 450 a Baali nĩ moragirũo.

Rĩrĩa gatu kanini koimĩrire iria-inĩ, Elija eerire Ahabu ũũ: ‘Harĩ kĩhuhũkanio gĩgũka. Haica ngari-inĩ yaku na ũinũke.’ Igũrũ rĩathimbanire na gũkĩgĩa na matu, rũhuho rũkĩhurutana, na mbura nene ĩkĩambĩrĩria kuura. Mũthia-inĩ, ng’aragu nĩ ĩngĩathirire. Ahabu aatwarithirie ngari yake na ihenya o ũrĩa angĩahotire. Nĩ ũndũ wa ũteithio wa Jehova, Elija aateng’erire nginya akĩhĩtũka ngari ĩyo ya Ahabu. No hihi mathĩna mothe ma Elija nĩ maathirĩte? Reke tuone.