Omapata omulongo aIsrael okwa li e na eehamba dihapu dii, ashike Ahab okwa li ohamba ii neenghono. Okwa li a hombola omukulukadi omukolokoshi oo a li ha longele Baal. Edina lomukulukadi oo oIsebel. Ahab naIsebel ova li va yadifa oshilongo nelongelokalunga laBaal nova dipaa ovaprofeti vaJehova. Mbela Jehova okwa li a ninga po shike? Okwa li a tuma omuprofeti Elia a twale etumwalaka laye kuAhab.

Elia okwa li a lombwela ohamba Ahab kutya odula itai ka loka muIsrael omolwoukolokoshi waye. Omapya kaa li a mena sha oule womido di dule punhatu, novanhu ova li tava fi ondjala. Opo nee Jehova okwa li a tuma vali Elia kuAhab. Ohamba oya li ye mu ula ya ti: ‘Oho etifa omaupyakadi! Keshe shimwe oove we shi etifa.’ Elia okwa li e mu nyamukula a ti: ‘Haame nda etifa oshikukuta, oove we shi etifa molwaashi oho longele Baal. Ongela oshiwana nosho yo ovaprofeti vaBaal komhunda yaKarmel tu ka tale kutya olyelye a etifa oshikukuta.’

Ovanhu ova li va ongala komhunda, ndele Elia ta ti: ‘Tokoleni, ngeenge Jehova oye Kalunga kashili, mu landuleni. Ngeenge oBaal, mu landuleni. Natu ka tale oo e li mondjila. Ovaprofeti vaBaal 450 nava longekide exwikiloyambo ndele tava ifana kalunga kavo, naame ohandi ka longekida exwikiloyambo ndele handi ifana Jehova. Oo ta ka nyamukula mokutuma omundilo oye Kalunga kashili.’ Ovanhu ova li va dimina.

Ovaprofeti vaBaal ova li va longekida exwikiloyambo. Ova kala tava ifana efiku alishe kukalunga kavo tava ti: ‘Baal, tu nyamukula!’ Elia okwa li e va yola molwaashi Baal ka li e va nyamukula. Okwa ti: ‘Ifaneni mokulekule. Pamwe okwa kofa, tu meni omunhu e ke mu pendule mo.’ Ovaprofeti vaBaal ova kala tava ifana fiyo oufiku. Ashike kapa li enyamukulo.

Elia okwa li a tula exwikiloyambo laye koaltari nokutila omeva kombada yalo. Opo nee okwa li a ilikana ta ti: ‘Jehova, ovanhu nava shiive kutya oove Kalunga kashili.’ Diva Jehova okwa li a tuma omundilo wa dja meulu ndele tau xwike po exwikiloyambo. Ovanhu ova li tava ingida tava ti: ‘Jehova oye Kalunga kashili!’ Elia okwa tya: ‘Inamu efa ovaprofeti vaBaal va ye.’ Efiku olo tuu olo, ovaprofeti vaBaal 450 ova li va dipawa.

 Mefuta omwa li mwa dja oshilemo shinini, na Elia okwa li a lombwela Ahab a ti: ‘Otaku di oshikungulu. Manga etemba loye ndele to i keumbo.’ Opo nee eulu ola li la laulikwa koilemo, omhepo oya li tai pepe, nodula oya li ya hovela okuloka neenghono. Hauxuuninwa, oshikukuta osha li sha xula. Ahab okwa li a shingilila etemba laye. Kekwafo laJehova, Elia okwa li a tondoka e dule etemba. Ndele mbela Elia ka li vali ta ka shakeneka oupyakadi washa? Natu ke shi taleni.