Ebihanda ikumi by’obwami bwe Israeli byabya n’abami banene ababi, aliwe Ahabu yuwabya mubi kutsibu. Mwathahya omukali omubi kutsibu oyuwabya akaramya Baali. Erina liwe abya ini yo Yezebeli. Ahabu na Yezebeli mubusulya Israeli yosi mw’eriramya lya Baali kandi mubitha abaminyereri ba Yehova. Ni kyahi ekya Yehova aby’akolire? Mwathuma omuminyereri Eliya eribwira Ahabu y’omwatsi.

Eliya mwabwira Omwami Ahabu athi busana n’obubi bwiwe, sihendi syabya embulha omwa Israeli. Ahabw’emyaka eyilhabire okw’isathu, ebyalya mubithalhasa kandi abandu mubakwa enzalha. Yehova kandi mwathuma Eliya oku Ahabu. Omwami mwabugha athi: ‘Wuli mutsibu! Niwe wamaleka ebi ibyabya.’ Eliya mwabugha athi: ‘Singye namaletha ekyanda eki. Niwe wamaleka busana n’eriramya Baali. Thukendi kolha ekikendi kangania Nyamuhanga w’okwenene nga nindi. Wuhindanaye ekihanda kye Israeli n’abaminyereri ba Baali okwa Kithwe Karmeli.’

Abandu mubahindana okwa kithwe. Eliya mwabugha athi: ‘Museghere hakuhi. Yehova amabya ini Nyamuhanga w’okwenene, mumukwame. Baali amabya iyo w’okwenene, mumukwame. Abaminyereri 450 ba Baali bathegheke obuhere n’eribirikira oku nyamuhanga wabu, naghe ngendi thegheka obuhere n’eribirikira oku Yehova. Oyukendi subirya omwa muliro, ya Nyamuhanga w’okwenene.’ Abandu mubaligha.

Abaminyereri ba Baali mubathegheka obuhere. Mubaghunza ekiro ekyosi ibane mubirikira nyamuhanga wabu bathi: ‘Iwe Baali, wuthwowe!’ Baali abere abirighana eribasubirya, Eliya mwabasindibuka. Mwabugha athi: ‘Mubirikire kutsibu. Obundi aghotsere, neryo akayithagha oyukamubukaya.’ Erigholho mulyahika, abaminyereri ba Baali ikubane mubirikira. Aliwe isihali oyukabasubiraya.

Eliya mwahira obuhere bwiwe okwa kiherero n’eryutha kw’amaghetse. Neryo mwasaba athi: ‘Kisi Yehova, leka abandu baminye ngoku n’iwe Nyamuhanga w’okwenene.’ Aho n’aho, Yehova mwathuma omuliro erilhua elhubulha n’erihisya obuhere. Abandu mubalhaka bathi: ‘Yehova ya Nyamuhanga w’okwenene!’ Eliya mwabugha athi: ‘Siwuleke abaminyereri  ba Baali bakabalha!’ Ekiro ekyo, abaminyereri 450 ba Baali mubithibwa.

Omughulhu akathu kake kabanika okwa ngetse, Eliya mwabwira Ahabu athi: ‘Embulha nene yinemwasa. Wutheghekanaye eggali yawu, wughende eka.’ Ekyanya mukyakinirana n’ebithu, omuyagha mwahitha, n’embulha nene muyatsukiraho eriwa. Erighunzerera, ekyanda mukyahwa. Ahabu mwaghendya eggali yiwe okwa sipidi nene ngoku angathoka. Busana n’obuwathikya bwa Yehova, Eliya mwathibitha kwilhaba eggali ya Ahabu! Aliwe ebitsibu byosi bya Eliya mubyanahwa? Thulebaye.