Masale kaayii tɔ wa o Isɔluɛi niŋndeŋ, lee nɔ bɔɔ masaa dɛnɛ wɔɔŋnda. Kɛ Ehabi ndoo hiou dɛnɛ wɔɔŋndo nɔ a nda kpou. Mbo chua wana lanɔ dɛnɛ wɔɔŋndo o nɔɔ niŋ. Nduyɛ, Baal wana lanɔɔ hoo ndoo sooluu ni. Diola ndɔlaŋ la wa Chɛsibɛɛ ni. Mi Ehabi nda Chɛsibɛɛ tosa mi waŋnda o lɛŋndeŋ niŋ kpou muliŋ Baal sooluuwo, nduyɛ ma diu diu wanaa ndaa suaa le Chɛhowa wa. Yɛɛ Chɛhowa ndoo tosa yɛ? Mbo viam Ilaacha naa Ehabi chua a yooŋgoo.

Mi Ilaacha dimul Masaa Ehabi maa le dɛnɛ ndɔ wɔɔŋndo, piɔɔ o piɔɔ cho sia o lɛŋnde Isɔluɛileŋ niŋ te. Le wɔsilaŋ la yaa a nyɛ lechoo, tɔlɔɔlaŋ laa kum te, nduyɛ mi yiaaŋ ma bii waŋnda. Okoŋ kɔɔli, mi Chɛhowa viam vɛlɛ Ilaacha naa Ehabi Chua. Mi masaa dimul ndu aa: ‘Wana la kpundɔɔ ŋ cho ni. Num tosa ni mi sɔɔŋ muŋ kpou wa yɔŋnɔŋndo.’ Mi Ilaacha dimul ndu aa: ‘O cho ya le tosa mi piɔɔ kɛɛ le siaa le. Num tosa ni, kanifuule a cho Baal sooluuwo. Ŋ tosaŋ nyɛ le sinaa le sabu piɔɔ kɛɛ siaa wo. Chuuŋgiaa waŋnda kpou, a wanaa suaa le Baal la o Pembii Kamɛl le choo.’

Mi waŋnda kɔ chuuŋgiaŋ o pembei choo. Mi Ilaacha dimul nda aa: ‘La tosa chuaŋ chuaa a ba nya. Te Chɛhowa cho Mɛlɛka tonyaa ni, la tol ndu kɔɔli. Te Baal ni, mɛɛ la tol ndu kɔɔli. Ŋ tosaŋ ndɔ hei. Ndi cho ni, ŋwaŋ 450 suaa le Baal la toosiaa salaa, ma piɛi o mɛlɛka ndaa lo. Nduyɛ mi ya toosiaa salaa, mi piɛi o Chɛhowa lo. Mɛlɛka cho yiŋndeŋ yɔŋgu mi le huŋ lom salaa wo, mɛɛ ndu cho Mɛlɛka tonyaa ni. Mi waŋnda kpou chɛl.

Mi wanaa suaa le Baal la toosiaa salaa. Le paaleŋ kpɛŋ a wa piɛileŋ o mɛlɛka ndaa lo aa: ‘Oo Baal, tuei naa diom fɔ!’ Mɛɛ Baal kɛɛ le piɛile ndaleŋ mulioo, mi Ilaacha wa nda mamɔɔ. Mbo dimul nda aa: ‘La chɔɔlu wɔɔ deŋi choo choo, naapum o luaŋ o cho ni. Waŋndo nɔ mbo kɔ tindi ndu.’ Wanaa suaa le Baal la lo piɛileŋ haaa mi paaleŋ le yɔŋguŋ. Kɛ a koŋ kpou, o muli piɛile ndaleŋ te.

Mi Ilaacha bɛɛ handu sala ndɔɔ o bandu luamaa lasalaa choo, mbo wou mɛŋndaŋ lechoo. Okoŋ mbo piɛi aa: ‘Oo Chɛhowa, yandii tosa mi waŋnda haa sina maa num cho Mɛlɛka tonyaa ni. O lepilɛ niŋ kpe, mi Chɛhowa yɔŋgu yiŋndeŋ fulaa o choo choo niŋ mi le huŋ lom sala ndɔɔ. Mi waŋnda deŋi choo choo ma dimi aa: ‘Chɛhowa cho Mɛlɛka tonyaa ni.’ Mi Ilaacha dimul nda aa: ‘La mal wanaa suaa kaŋ  le Baal la ma nyaanuŋ te.’ O paale leŋ choo, mbo dii wanaa suaa le Baal la 450.

Mɛɛ yumbu yumboo fula nyɛɛmbɔ o pee mɛŋma ihɛllo choo, mi Ilaacha dimul Ehabi aa: ‘Hueiye kandu hɔŋndo, hel o nyɛ num nyaanaŋ suaa naŋndo choo ma kuɛ o numndo bɛɛ.’ Mi choo piimiaa kpilo. Mi hueiye kandu hɔŋndo. Mi piɔɔ bɛndu bɛndoo kandu siaa. O mɛɛlulaŋ kpɔŋ, mi wɔɔle kala kalale leŋ le chuu. Ehabi wa nyaanɔŋndo tau a nyɛ ndɔ nyaanaŋ suaa naŋndo. Kɛ a mala Chɛhowaa, Ilaacha wa nyaanɔŋndo mbo hiau nyɛ nyaanaŋ suaa naŋndo. Kɛ baa bahawɛila Ilaacha laŋ laa chuu pa? Ŋ tofaŋndɔ.