တၢ်မၤလိ ၄၆
တၢ်မၤကွၢ်လၢ ကစၢၢ်ကၢ်မ့ၤလးအလိၤ
ပှၤအံၣ်စရ့လးဖိအဒူၣ်တဆံအစီၤပၤတဖၣ်န့ၣ် မၤတၢ်အၢတၢ်သီလီၤ. ဒီးစီၤအၤဃာ်န့ၣ် မ့ၢ်စီၤပၤလၢအအၢအသီဖးဒိၣ်တဂၤလီၤ. စီၤအၤဃာ်အမါန့ၣ် မ့ၢ်ဝဲပိာ်မုၣ်အအၢအသီတဂၤလၢ အဘူၣ်ထီၣ်ဘါထီၣ်ဝဲဘဧၤလးလီၤ. ဒီးအမံၤမ့ၢ်ဝဲနီၢ်အံၤစ့ဘ့ၤလးလီၤ. ခီဖျိလၢ စီၤအၤဃာ်ဒီးနီၢ်အံၤစ့ဘ့ၤလးအဃိ ကီၢ်အံၣ်စရ့လးဒီကီၢ်ညါ ပှဲၤဒီးတၢ်ဘူၣ်ထီၣ်ဘါထီၣ်ဘဧၤလး ဒီးယဟိဝၤယွၤအဝံတဖၣ် ဘၣ်တၢ်မၤသံအဝဲသ့ၣ်လီၤ. လၢတၢ်န့ၣ်အဃိ ယဟိဝၤယွၤကမၤဝဲဒ်လဲၣ်. ကစၢ်ယွၤဆှၢလီၤဝံအ့ၤလံယၤလၢ ကလဲၤတဲဘၣ်ဝဲစီၤအၤဃာ်လၢ တၢ်ကစီၣ်တခါလီၤ.
ဝံအ့ၤလံယၤတဲဘၣ် စီၤအၤဃာ်လၢ ခီဖျိလၢ နမၤတၢ်အၢတၢ်သီအဃိ တၢ်တစူၤလီၤလၢကီၢ်အံၣ်စရ့လး အပူၤဘၣ်. မူခိၣ်တစူၤဝဲ သၢနံၣ်ဒီးဃုလါလံအဃိ တၢ်မုၢ်တၢ်ဘိတဖၣ် တမဲထီၣ်ဝဲဂ့ၤဂ့ၤဘၣ်ဒီး ပှၤဂီၢ်မုၢ်တဖၣ်လီၤဒိဝဲလီၤ. လၢခံန့ၣ် ယဟိဝၤယွၤမၢဝဲ စီၤအ့ၤလံယၤလဲၤကဒါက့ၤဆူ စီၤအၤဃာ်အအိၣ်လီၤ. ဒီးစီၤပၤတဲဘၣ် စီၤအ့ၤလံယၤလၢ– ‘ခီဖျိလၢနၤအဃိ မူခိၣ်တစူၤလီၤဝဲဘၣ်.’ စီၤအ့ၤလံယၤတဲဆၢက့ၤအီၤလၢ– ‘မူခိၣ်တစူၤလီၤဘၣ်န့ၣ် တမ့ၢ်လၢယဃိဘၣ်. မ့ၢ်လၢနဘူၣ်ထီၣ်ဘါထီၣ် ဘဧၤလးအဃိလီၤ. ကိးဖှိၣ်ထီၣ်ပှၤဂီၢ်မုၢ်တဖၣ် ဒီးဘဧၤလးအဝံတဖၣ် ဒီးမၢအဝဲသ့ၣ်လဲၤထီၣ်လၢ ကစၢၢ်ကၢ်မ့ၤလးအလိၤတက့ၢ်. ဒီးဖဲန့ၣ်န့ၣ် ပကမၤကွၢ်တၢ်တမံၤလီၤ.’
ပှၤဂီၢ်မုၢ်တဖၣ်လဲၤထီၣ်ဝဲဆူ ကစၢၢ်လိၤလီၤ. ဒီးစီၤအ့ၤလံယၤတဲဝဲလၢ– ‘ဆၢတဲာ်လီၤသုသးသၢၣ်. ယဟိဝၤယွၤမ့မ့ၢ် ယွၤလၢအမ့ၢ်အတီန့ၣ် မၤအတၢ်တက့ၢ်. ဘၣ်ဆၣ် ဘဧၤလးမ့မ့ၢ်ယွၤလၢအမ့ၢ်အတီန့ၣ် မၤအတၢ်တက့ၢ်. ယကတၤသုဒ်အံၤလီၤ. ဘဧၤလးအဝံအဂၤ ၄၅၀ န့ၣ် ကြၢးကတဲာ်ကတီၤထီၣ်ဝဲ တၢ်လုၢ်ထီၣ်ဒီးကိးထီၣ်ဆူအယွၤအအိၣ်လီၤ. မ့မ့ၢ်ယၤန့ၣ် ယကကတဲာ်ကတီၤထီၣ်တၢ်လုၢ်ဒီး ကိးထီၣ်ယဟိဝၤယွၤလီၤ. ယွၤလၢအစံးဆၢတၢ်လၢမ့ၣ်အူန့ၣ် မ့ၢ်ယွၤလၢအမ့ၢ်အတီလီၤ.’ ပှၤဂီၢ်မုၢ်တဖၣ် အၢၣ်လီၤတူၢ်လိာ်ဝဲ ဝံအ့ၤလံယၤအတၢ်ကတိၤလီၤ.
ဘဧၤလးအဝံတဖၣ် ကတဲာ်ကတီၤထီၣ်ဝဲတၢ်လုၢ်လီၤ. အဝဲသ့ၣ်ကိးထီၣ်ဝဲအယွၤဒီတနံၤလၢ– ‘အိ ဘဧၤလးဧၢ, စံးဆၢပှၤသၢၣ်.’ ခီဖျိလၢ ဘဧၤလးတစံးဆၢအဝဲသ့ၣ်အဃိ ဝံအ့ၤလံယၤတဲဆါအဝဲသ့ၣ်လီၤ. စီၤအ့ၤလံယၤတဲဘၣ်အဝဲသ့ၣ်လၢ– ‘ကိးထီၣ်မ့ၢ်ဒိၣ်သၢၣ် ဘၣ်သ့ၣ်သ့ၣ် ဘဧၤလးကမံဘၣ်အသး ဒီးပှၤတဂၤဂၤကဘၣ် လဲၤကိးဂဲၤဆၢထၢၣ်အီၤဧါသၢၣ်.’ ဘဧၤလးအဝံတဖၣ် ကိးထီၣ်ဝဲဘဧၤလးတုၤလီၤလၢ ဟါခီန့ၣ်လီၤ. ဘၣ်ဆၣ် ဘဧၤလးတစံးဆၢအဝဲသ့ၣ်ဘၣ်.
ဝံအ့ၤလံယၤပာ်ထီၣ်အတၢ်လုၢ်လၢ တၢ်လုၢ်လီၢ်အဖီခိၣ် ဒီးလူဘၣ်စီၣ်ဝဲလၢထံလီၤ. ဝံၤဒီးဝံအ့ၤလံယၤဃ့ဘါထုတဖၣ်ဝဲလၢ– ‘အိ ယဟိဝၤယွၤဧၢ, ဝံသးစူၤဒုးသ့ၣ်ညါပှၤဂီၢ်မုၢ်တဖၣ်အံၤလၢ နမ့ၢ်ယွၤလၢအမ့ၢ်အတီတက့ၢ်.’ တဘျီဃီန့ၣ် ယဟိဝၤယွၤဆှၢလီၤဝဲမ့ၣ်အူလၢ မူခိၣ်ဒီးအီၣ်ကွံာ်ဝဲတၢ်လုၢ်အံၤလီၤ. ပှၤဂီၢ်မုၢ်တဖၣ် ကိးပသူထီၣ်ဝဲလၢ– ‘ယဟိဝၤယွၤမ့ၢ်ယွၤလၢ အမ့ၢ်အတီလီၤ.’ ဝံအ့ၤလံယၤတဲဝဲလၢ– ‘ဒုးပူၤဖျဲးဘဧၤလးအဝံနီတဂၤတဂ့ၤ.’ ဖဲနံၤအဝဲန့ၣ် ဘဧၤလးအဝံအဂၤ ၄၅၀ န့ၣ်ဘၣ်တၢ်မၤသံကွံာ်အဝဲသ့ၣ်လီၤ.
ဖဲတၢ်အၢၣ်ဆံးဆံးဖိ ဟဲအိၣ်ဖျါထီၣ်လၢပီၣ်လဲၣ်အဖီခိၣ်အခါ ဝံအ့ၤလံယၤတဲဘၣ်စီၤအၤဃာ်လၢ– ‘ကလံၤမုၢ်ဟဲဝဲလံ. ဒိးထီၣ်နလ့ၣ်ကဟၣ် ဒီးက့ၤဆူနဟံၣ်တက့ၢ်.’ တၢ်အၢၣ်ထီၣ်သူဒီးမူခိၣ်ခံးလီၤဝဲ, ကလံၤမုၢ်စးထီၣ်အူတၢ်ဒီး မူခိၣ်စးထီၣ်စူၤလီၤဝဲဖးဒိၣ်လီၤ. ဖဲန့ၣ်အဆၢကတီၢ် တၢ်ယီၤဃ့ကတၢၢ်ကွံာ်ဝဲလီၤ. စီၤအၤဃာ်နီဝဲအလ့ၣ်ကဟၣ်လၢ အချ့ကတၢၢ်လီၤ. လၢယဟိဝၤယွၤ အတၢ်မၤစၢၤအဃိ ဝံအ့ၤလံယၤဃ့ၢ်တလၢကွံာ်ဝဲ စီၤအၤဃာ်အလ့ၣ်ကဟၣ်လီၤ. ဘၣ်ဆၣ် မ့ၢ်ဝံအ့ၤလံယၤ ကဘၣ်လဲၤခီဖျိတၢ်ကီတၢ်ခဲ တမံၤမံၤဒံးဧါ. ပကကွၢ်သကိးလၢ တၢ်မၤလိလၢခံတခါလီၤ.
“ဒီးကသ့ၣ်ညါလၢ နဲဒၣ်တဂၤဃီလၢ နမံၤမ့ၢ်ယဟိဝၤန့ၣ် မ့ၢ်တၢ်ထီကတၢၢ်တဂၤလၢ ဟီၣ်ခိၣ်ဒီဘ့ၣ်ညါအဖီခိၣ်လီၤ.”—စံးထီၣ်ပတြၢၤ ၈၃:၁၈
တၢ်ဂ့ၤအဂၤလၢ နကဘၣ်သး
ကွၢ်လိမၤဒိးအဝဲသ့ၣ်အတၢ်နာ်
ဝံအ့ၤလံယၤ—အဝဲ ဆၢထၢၣ်ဂၢၢ်ဂၢၢ်ကျၢၤကျၢၤလၢ တၢ်ဘူၣ်တၢ်ဘါအမ့ၢ်အတီအဂီၢ်
ဖဲပတဲသကိးတၢ်ဒီး ပှၤလၢအတတူၢ်လိာ် လံာ်စီဆှံအတၢ်သိၣ်လိတဖၣ်န့ၣ် ပကွၢ်လိမၤဒိး ဝံအ့ၤလံယၤကသ့ဒ်လဲၣ်.
တၢ်ဖးလံာ်စီဆှံဒ်တၢ်ဂဲၤဒိပူနီၢ်နီၢ်
ယဟိဝၤမ့ၢ် ယွၤအမ့ၢ်အတီ ထဲတဂၤဧိၤလီၤ
ပကဟ့ၣ်လီၤပသးလၢ ယဟိဝၤယွၤ အလီၢ်ပမ့ၢ်ဟ့ၣ်လီၤပသးလၢ ပှၤတဂၤဂၤ မ့တမ့ၢ် တၢ်တမံၤမံၤအဂီၢ်န့ၣ် ဘၣ်မနုၤအဃိ မ့ၢ်ပတအိၣ်ဒီးတၢ်ကူၣ်သ့လဲၣ်.
