Muna kintinu kia makanda kumi ma Isaele, atinu ayingi ambi bayala mo. Kansi muna yau awonso, Akabi i wasunda o bi. Wasompana ye kimpumbulu kia nkento ona wasambilanga Bale. E nkumbu andi Izebele. Akabi yo Izebele bazadisa e nsi ye nsambil’a Bale yo vonda e ngunza za Yave. Adieyi Yave kavanga? Watuma Eleya wa ngunza kenda zayisa e nsangu kwa Akabi.

Eleya wavovesa Akabi wa ntinu vo muna kuma kia mambu mambi kavanganga, ke mu noka mvula ko muna Isaele. Mu kolo kia mvu ntatu, e mbongo ke yamenanga ko muna mpatu, o nkangu nzala bafwanga. I bosi, Yave watuma diaka Eleya kwa Akabi. O ntinu wavova vo: ‘Ngeye u mvavi a mambu. Mawonso mama ngeye otwese mo.’ Eleya wavutula vo: ‘Ke mono ko yatwese e kala kiaki. Ngeye kibeni watwese kio kadi Bale osambilanga.’ Mpaka tufilana. Kutakesa o nkangu ye ngunza za Bale vana Mongo a Kamele.

O nkangu wakutakana vana mongo. Eleya wavova vo: ‘Nutoma sia e sungididi. Avo Yave i Nzambi aludi, nunlanda. Avo Bale, nunlanda. Owu tuvanga: 450 ma ngunza za Bale bafwete kubika lukau yo samba kwa nzambi au, omono mpe ikubika lukau yo samba kwa Yave. Ona ovana e mvutu muna twika o tiya, yandi i Nzambi aludi.’ O nkangu watambulwila.

E ngunza za Bale bakubika lukau. Lumbu kiawonso babokanga kwa nzambi au oku vo: ‘E Bale, utuvana e mvutu.’ Wau vo Bale kabavananga mvutu ko, Eleya wayantika kubaseva. Wabavovesa vo: ‘Nukaza diaka. Nanga ku tulu kena, kafwete sikameswa kwa muntu.’ E tombe kiayiza, e ngunza za Bale bakwamanana boka. Kansi, ke vekala ona wabavana mvutu ko.

Eleya wasia lukau lwandi vana ziku yo yitila lo maza. I bosi, wasamba vo: E Yave dó, yambula nkangu bazaya wo vo ngeye i Nzambi a ludi.’ Vana vau, Yave watwika tiya tuka kuna zulu yo yoka lukau. O nkangu wayantika kaza  vo: ‘Yave i Nzambi a ludi.’ Eleya wavova vo: ‘Ke nuvukisa ngunza za Bale ko.’ Muna lumbu kiakina, 450 ma ngunza za Bale bavondwa.

Vava e tuti diakete diamoneka muna mbu, Eleya wavovesa Akabi vo: ‘Kimbongela kilweke. Baka kalu diaku yo vutuka kuna nzo.’ E zulu dialomboka ye matuti, vabwa tembwa yo yayantika noka mvula yangolo. E kala kiafokoka. Akabi wadiatisa e kalu diandi mu nzaki zawonso. Muna lusadisu lwa Yave, Eleya wazaula yo luta nkutu e kalu dia Akabi. Kansi, nga e mpasi zawonso za Eleya zafokoka? Yambula twazaya.