Iˉsaˍreˍlaˆ 10 chaw ceuˬ hkʼaw maˇ daꞈ ve jawˇ mawˇ laiˉ gʼaˇ cawˬ ve yoˬ. Yaꞈ hkʼaˇ, haiˬ jaˇ ve teˇ gʼaˇ lehˬ jawˇ mawˇ Aˍhaˆ hpehꞈ ve yoˬ. Yawˇ lehˬ Yeˍsaˍbeˍlaˆ haiˬ jaˇ ve yaˇ miˇ Baˍlaˆ gʼuiˬ sha htaꞈ oˉ kʼoˍ pui ve geh heuˆ ve yoˬ. Jawˇmawˇ Aˍhaˆ leh jawˇ mawˇ ma Yeˍsaˍbeˍlaˆ mvuhˇ miˬ hkʼaw Baˍlaˆ gʼuiˬ sha htaꞈ oˉ kʼoˍ pui ve hkʼa biˇ cawˬ tuˬ te leh Yaˬhoˉvaˬ ve tcuh kaˍ paˍ laiˉ gʼaˇ htaꞈ tiˇ pehˍ ve yoˬ. Chi ve htaꞈ Yaˬhoˉvaˬ hkʼaˬ hkʼe gu piˇ tuˬ le? Gʼuiˬ sha tcuh kaˍ paˍ Eˇliˇyaꞈ htaꞈ Aˍhaˆ geh kʼai tcuh ve yoˬ.

Eˇliˇyaꞈ jawˇ mawˇ Aˍhaˆ htaꞈ kʼoˆ piˇ ve, nawˬ haiˬ ve pa taw, Iˉsaˍreˍlaˆ mvuhˇ miˬ hkʼaw mvuhˇ yeˬ laˬ tuˬ ve maˇ heˆ. Mvuhˇ yeˬ 3 hkʼawꞈ hpaˆ hkʼa gaˬ maˇ laˬ leh ti caˇ maˇ gʼa ve pa taw, mvuhˇ miˬ yaˇ gʼa meuꞈ jehˇ tuˬ yoˬ. Oˇ ve hkʼawꞈ nawˉ, Yaˬhoˉvaˬ Eˇliˇyaꞈ htaꞈ jawˇ mawˇ Aˍhaˆ geh kʼawꞈ kʼai tcuh ve yoˬ. Aˍhaˆ Eˇliˇyaꞈ htaꞈ kʼoˆ piˇ ve, ‘nawˬ ngaˬ hui shoꞈ shaꞈ tuˬ te laˇ ve law leˇ!’ Eˇliˇyaꞈ hkʼawꞈ piˇ ve, ‘nawˬ Baˍlaˆ gʼuiˬ sha htaꞈ oˉ kʼoˍ pui ve pa taw, nawˬ shoꞈ shaꞈ tuˬ te shehˍ hpaˇ hpehꞈ ve yoˬ. Lawˇ nyi gaˇ˗a laˇ? Iˉsaˍreˍlaˆ chaw leh Baˍlaˆ ve tcuh kaˍ paˍ hui Kaˍmeˍlaˆ hkʼaw hkʼoˆ lo ngaˬ htaꞈ hpuˇ daꞈ la tuˬ nawˬ tawˇ piˇ˗oˆ.’

Iˉsaˍreˍlaˆ chaw Kaˍmeˍlaˆ hkʼaw hkʼoˆ lo hpoˆ laˬ ve yoˬ. Eˇliˇyaꞈ kʼoˆ ve, ‘nawˬ hui hkʼaˬ hkʼe te tuˬ dawˇ cheˆ loˬ. Yaˬhoˉvaˬ awˬ tehˬ awˬ na ve Gʼuiˬ sha hpehꞈ ve kʼo, yawˇ htaꞈ oˉ kʼoˍ pui˗o. Baˍlaˆ awˬ tehˬ awˬ na ve gʼuiˬ sha hpehꞈ ve kʼo, yawˇ htaꞈ oˉ kʼoˍ pui˗o! Baˍlaˆ ve tcuh kaˍ paˍ 450 gʼaˇ tuˉ tanˇ tuˬ gu leh nawˬ hui ve gʼuiˬ sha htaꞈ gʼaˇ hteꞈ kuˬ piˇ˗oˆ. Ngaˬ lehˬ tuˉ tanˇ tuˬ htaꞈ gu leh Yaˬhoˉvaˬ htaꞈ kuˬ tuˬ yoˬ. Gʼuiˬ sha hkʼaˬ ve teˇ gʼaˇ tuˉ tanˇ tuˬ htaꞈ aˬ miˍ toꞈ piˇ gʼa ve kʼo, awˬ tehˬ awˬ na ve Gʼuiˬ sha hpehꞈ ve yoˬ.’ Yawˇ hui htawˇ nyi ma cawˇ ve yoˬ.

Baˍlaˆ ve tcuh kaˍ paˍ tuˉ tanˇ tuˬ gu leh ‘Baˍlaˆ gʼuiˬ sha˗oˬ, ngaˬ hui ve bon lawˬ hkawˇ htaꞈ a ciˉ na yuˬ laˇ˗oˆ’ tehꞈ teˇ nyi tanˇ vanˇ kuˬ ve yoˬ. Baˍlaˆ maˇ hkʼawꞈ piˇ ve teˇ yanˇ, Eˇliˇyaꞈ maˇ shawˍ maˇ caˆ te leh kʼoˆ ve, ‘gʼaˇ hteꞈ kuˬ loˬ. Baˍlaˆ zuhꞈ muiˉ kʼa chehˇ ve leh naˍ.’ Baˍlaˆ ve tcuh kaˍ paˍ mvuhˇ hpeuꞈ hkʼa gaˬ yawˇ hui ve gʼuiˬ sha htaꞈ kuˬ chehˇ ve yoˬ. Yaꞈ hkʼaˇ, teꞈ chiˉ maˇ hpehꞈ la.

Eˇliˇyaꞈ tuˉ tanˇ tuˬ gu teh taˍ leh iˉ kaˆ hkʼa nehˆ pfuhˍ peuˬ hkʼawꞈ nawˉ, yawˇ bon lawˬ leh kʼoˆ ve, ‘Yaˬhoˉvaˬ˗oˬ, nawˬ awˬ tehˬ awˬ na ve Gʼuiˬ sha hpehꞈ ve yawˇ hui gʼa shiˍ tuˬ, ngaˬ ve bon lawˬ hkawˇ htaꞈ a ciˉ na yuˬ laˇ˗oˆ.’ Teˇ cawˬ haˉ Yaˬhoˉvaˬ mvuhˇ naw ma lo aˬ miˍ ce la piˇ leh Eˇliˇyaꞈ ve tuˉ tanˇ tuˬ htaꞈ toꞈ  baˬ ve yoˬ. Yawˇ hui gʼaˇ hteꞈ kuˬ leh kʼoˆ ve, ‘Yaˬhoˉvaˬ lehˬ awˬ tehˬ awˬ na ve Gʼuiˬ sha hpehꞈ ve yoˬ!’ Eˇliˇyaꞈ kʼoˆ ve, ‘Baˍlaˆ ve tcuh kaˍ paˍ teˇ gʼaˇ htaꞈ kaꞈ taˇ ponˬ piˇ!’ Oˇ ve teˇ nyi hkʼaw, Baˍlaˆ ve tcuh kaˍ paˍ 450 gʼaˇ htaꞈ tiˇ pehˍ piˇ ve yoˬ.

Moˬ teˇ diˬ ehˉ laˇ tsuhˇ gʼuiˬ hkʼoˆ tawˆ la htaˇ, Eˇliˇyaꞈ jawˇ mawˇ Aˍhaˆ htaꞈ kʼoˆ piˇ ve, ‘mvuhˇ yeˬ maˇ laˬ sheˍ htaˇ kaꞈ, iˉ mvuhˇ lawˬ ciˇ leh aˉ hkʼaw lo haˆ haˆ kʼawꞈ kʼoꞈ˗e loˬ.’ Oˇ ve hkʼawꞈ nawˉ, mvuhˇ naˆ mvuhˇ hoꞈ mvuhˇ yeˬ gʼaˇ hteꞈ laˬ ve yoˬ. Hkʼe te leh, mvuhˇ goˇ ve maˇ kʼawꞈ cawˬ˗o. Aˍhaˆ iˉ mvuhˇ lawˬ gʼaꞈ gehˬ jaˇ. Yaꞈ hkʼaˇ, Yaˬhoˉvaˬ Eˇliˇyaꞈ htaꞈ ga piˇ leh Aˍhaˆ ve iˉ mvuhˇ lawˬ awˬ gʼuˇ suhˍ lo gʼuiˇ kʼai ve yoˬ! Yaꞈ hkʼaˇ, Eˇliˇyaꞈ ve awˬ lawn kʼawꞈ cawˬ sheˍ.