Mubuso wa Isilaele wa masika alishumi neubusizwe ki malena babañata babamaswe, kono Akabe naaezize lika zemaswe hahulu nikufita. Naanyezi musali yasituhu ili yanaalapela Baale . Libizo la musali yo neli Jezabele. Akabe ni Jezabele nebatalize naha ka bulapeli bwa Baale mi nebabulaile bapolofita ba Jehova. Ki lika mañi zanaaezize Jehova? Aluma mupolofita Elia kuisa lushango ku Akabe.

Elia abulelela Mulena Akabe kuli mwa Isilaele hakuna kuba ni pula kabakala lika zemaswe zanaaeza. Ka lilimo zefitelela zetaalu, licalo nelisa meli mi batu nebashwa tala. Hasamulaho, Jehova aluma Elia ku Akabe hape. Mulena kihaa li: ‘Ki wena yalutahiseza butata! Ki mulatu wahao.’ Elia kiha alaba kuli: ‘Haki na yatahisize kuli kube ni linanga. Ki wena yatahisize kuli kube cwalo kakuli ulapela Baale. Lukaeza nto yeñwi kuli luzibe kuli Mulimu wa niti ki mañi. Ukopanye sicaba ni bapolofita ba Baale fahalimwaa Lilundu la Karmele.’

Batu bakubukana fa lilundu. Elia kihaa li: ‘Hamueze keto. Haiba Jehova ki yena Mulimu wa niti, hamu mulatelele. Kono haiba ki Baale, hamu mulatelele. Haluezeñi cwalo. Bapolofita ba Baale ba 450 balukise sitabelo ni kubiza mulimu wabona, mi nika lukisa sitabelo ni kubiza Jehova. Mulimu yakaalaba ka kuluma mulilo ki yena Mulimu wa niti.’ Batu balumela.

Bapolofita ba Baale balukisa sitabelo. Babiza mulimu wabona lizazi kaufela: ‘Wena Baale, haku lualabe!’ Baale hanaasika aalaba, Elia abasheununa. Kihaa li: ‘Hamuhuwe hahulu. Mwendi ulobezi, mi utokwa mutu yaka muzusa.’ Neseli manzibwani, mi bapolofita ba Baale nebazwelapili kumubiza. Kono nekusina yanaalaba.

Elia abeya sitabelo sahae fa aletare mi kihona asela mezi fateñi. Cwale alapela, ali: ‘Wena Jehova, haike batu bazibe kuli ki wena Mulimu wa niti.’ Honafo feela, Jehova aluma mulilo kuzwa kwa lihalimu mi wacisa sitabelo. Batu kiha bahuwa kuli: ‘Jehova ki yena Mulimu wa niti!’ Elia kihaa li: ‘Musike mwatuhelela bapolofita ba Baale  kubaleha!’ Ka lizazi leo, bapolofita ba Baale ba 450 nebabulailwe.

Hane kubonahezi lilu lelinyinyani fahalimwaa liwate, Elia kihaa li ku Akabe: ‘Kutaha pula yetuna. Lukisa koloi yahao, mi uye kwandu.’ Kwahalimu kwaunsufala kabakala malu, moya wafuka, mi pula yetuna yakala kusuluha. Kwa mafelelezo, linanga lafela. Akabe amatisa koloi yahae ka mwanaakonela kaufela. Ka tuso ya Jehova, Elia amata hahulu mi asiya koloi! Kono kana matata a Elia naafelile kaufelaa ona? Haluboneñi.