Aene aingi aateekanga imitundu 10 iya Ina Izlaeli yayanga aipe, lelo Aabu wene wacizilemo. Watwazile umwanaci umwipe uwapepanga Baali. Izina lyakwe wali a Yezebele. Aabu na Yezebele yaalenzile ukuti antu aingi yapepa Baali nupya yakomile na ya kasesema yakwe Yeova. Uzye Yeova wacisile uli? Watumile kasesema Eliya kuti atwale mazwi kuli Aabu.

Eliya wanenyile Umwene Aabu ukuti pa mulandu ni viipe vino ukacita, mutalaya imvula umu Izlaeli. Kucila pa myaka itatu, vilimwa vitatazile vimele nupya antu yali ni nzala. Lino papisile insita, nupya kwene Yeova watumile Eliya kuli Aabu. Umwene watiile: ‘Wewe kacita wa viipe! Nupya wewe watulenga vyonsi vii.’ Eliya waswike ati: ‘Asi neene naleenga ukuti kuye icilala. Wewe walenga pa mulandu wakuti ukapepa Baali. Tumacita vii. Ukolonganike uluko lonsi na ya kasesema yakwe Baali pa Mwamba wa Kalimeli.’

Antu yaakolongine pa mwamba. Eliya walanzile ati: ‘Soololinipo. Ndi cakuti Yeova aali Leza wa cumi, ali wino mwapepa. Lelo Baali nga aali Leza wa cumi, ali wino mwapepa. Tumalola Leza wa cumi. Ya kasesema yakwe Baali 450 yapekanye uwila nu kupepa kuli leza wao, nani nimapekanya uwila nu kupepa kuli Yeova. Amaasuka ukuomvya umoto ali Leza wa cumi.’ Antu yonsi yazumile.

Ya kasesema yakwe Baali yapekinye mawila. Nupya yapefile kuli leza wao uwanda onsi ala yakuti: ‘We Baali, twasuke!’ Lino Baali wakanyile ukwasuka, Eliya watandike ukuyatumfya ati: ‘Pundisyini sana. Limwi watalala akulondekwa uwa kumuzyula.’ Ya kasesema yakwe Baali yatwalilile ukupepa mpaka amanguzi. Nomba kutaali uwaswike.

Eliya wisile uwila pa ulambo nupya witiile amanzi kuzingulusya ulambo. Nupya wapefile ati: ‘We Yeova, napaapata leka antu yonsi yamanye ukuti wewe uli Leza uwa cumi.’ Papo kwene sile, Yeova watumile umuto ukufuma ukwi yulu ioca uwila. Lyene antu yapunzile iyati: ‘Yeova ali Leza wa cumi!’ Eliya nawe watile: ‘Mutaleka ya  kasesema yakwe Baali yutuke!’ Uwanda kwene uwa, ya kasesema yakwe Baali 450 yakomilwe.

Lino akalikumbi kanono kalolike, Eliya waneenyile Aabu ati: ‘Imvula imaiza. Kwela iceleta lyako uwapita uku ng’anda.’ Ukwi yulu kwafiisile pa mulandu na makumbi, umuza watandike ukupunga icakuti imvula iipisye yatandike ukutoonya. Lyene, icilala casizile. Aabu wasimwizye sana iceleta pano angapezya. Lelo Yeova wazwilizye Eliya ukusimula ukucila ni celeta! Nomba uzye intazi zyonsi zino Eliya wakweti zyasizile? Leka tulole.