Elõñ iaan kiiñ ro an bwij ko 10 ilo Israel rar lukkuun nana, im Ehab ear juon iaan ro im el̦aptata an nana. Ear m̦areik juon kõrã enana etan in Jezebel me ear kabuñ ñan Beal. Ehab im Jezebel rar kõm̦m̦an bwe armej ro ilo ãneo ren kabuñ ñan Beal, im rar m̦an rũkanaan ro an Jeova. Ta eo Jeova ear kõm̦m̦ane? Ear jilkinl̦o̦k Ilaija bwe en ba l̦o̦k ñan Ehab naan ko An.

Ilaija ear ba ñan Kiiñ Ehab bwe kõn an lukkuun nana, eban bar wõt ilo aelõñin Israel. Elõñl̦o̦k jãn jilu iiõ in an kar ejjel̦o̦k keinikkan rar eddek, im armej ro rar kwõle. Jeova ear bar jilkinl̦o̦k Ilaija ñan ippãn Ehab. Ehab ear ba ñane: ‘Kwe rũkõm̦m̦an jorrããn! Kwe eo kwaar kõm̦m̦an bwe men in en wal̦o̦k.’ Ilaija ear ba: ‘Ejjab ña eo iar kõm̦m̦an bwe en jab wõt, kwe eo kwaar bõktok jorrããn in kõn am̦ kabuñ ñan Beal.’ Ilaija ear kõn̦aan kaalikkar wõn Anij eo em̦ool, innem ear ba: ‘Kũrtok armej ro kab rũkanaan ro an Beal ñan ioon Tol̦ Karmel bwe jen lale wõn Anij eo em̦ool.’

Innem armej ro rar etal ñan ioon tol̦ eo. Ilaija ear ba: ‘Kom̦win kaalikkare wõn eo kom̦ij kããlõte. El̦aññe Jeova ej Anij eo em̦ool, kom̦win l̦oore. Ak el̦aññe Beal, eokwe kom̦win l̦oore. Jen lale wõn iaaerro ej Anij eo em̦ool. Rũkanaan ro 450 an Beal ren kõpooje juon aer menin katok im ren kũr etan Beal, im ña inaaj bar kõpooje juon aõ menin katok im kũr etan Jeova. Eo enaaj uwaak ilo an jilkintok kijeek, e in ej Anij eo em̦ool.’ Ear em̦m̦an men in ippãn armej ro.

Rũkanaan ro an Beal rar kõpooje menin katok eo aer. Ilo aolepen raan eo, rar kũr etan anij eo aer im ba: ‘O Beal, jouj im uwaake kõm!’ Ke ear ejjel̦o̦k uwaak, Ilaija ear kõm̦m̦an kõjak kake Beal. Ear ba: ‘Kom̦win kal̦apl̦o̦k joñan ainikiemi im kõmaat ami maroñ. Joñan in ej kiki, im juon ej aikuj karuji.’ Ke ej jotal̦o̦k, rũkanaan ro an Beal rar pãddo kũr etan, ak ejjañin de kar wõr uwaak.

Ilaija ear likũti menin katok eo an ioon lokatok eo im lutõkl̦o̦k dãn ñan aolepen lokatok in. Innem ear jar im ba: ‘O Jeova, jouj im kwal̦o̦k ñan armej rein bwe kwe eo kwõj Anij eo em̦ool.’ Kõn men in, Jeova ear m̦õkaj im jilkintok kijeek jãn lañ ñan tile menin katok eo. Innem armej ro rar lam̦õj im ba: ‘Jeova ej Anij eo em̦ool!’ Ilaija ear ba ñan er:  ‘Jibwe rũkanaan ran̦e an Beal bwe ren jab ko!’ Ilo raan eo wõt, rũkanaan ro 450 an Beal rar mej.

Ke Ilaija ear reimetol̦o̦k im loe juon kõdo̦ jidikdik, ear etal im ba ñan Ehab: ‘Juon n̦e l̦añ ej pojakin wal̦o̦k. Kwõn bõk jariot n̦e waam̦ im ro̦o̦l ñan m̦weo im̦õm̦.’ Ear jino an kilmeej lañ, l̦ap kõto, im wõt mijeljel. Iien eo in ej kab bar jino an wõt. Ke Ehab ej ettõr kõn jariot eo waan, ear lukkuun kaiim̦. Ak kõn jipañ eo an Jeova, Ilaija ear ettõr im m̦õkaj jãn jariot eo waan Ehab! Kiiõ kajjitõk eo in, em̦õj ke an jako aolep apañ ko Ilaija ear iiooni? Eokwe jen lale.