Ipan nopa matlaktli pilaltepetsitsij tlen Israel, tekichijkej miakej katli kichijkej tlen amo kuali. Tlanauatijketl Acab kichijki tlen tlauel amo kuali. Mosiuajtik iuaya se siuatl tlen kichiuayaya tlen tlauel amo kuali uan kiueyichiuayaya Baal. Nopa siuatl motokaxtiyaya Jezabel. Acab uan Jezabel kichijkej sekinok nojkia ma kiueyichiuakaj Baal. Uan kinmiktijkej miakej Jehová itlajtolpanextijkauaj. ¿Tlake kichijki Jehová? Kiiljuik tlajtolpanextijketl Elías ma kiitati Acab uan ma kiiljui tlen panoskia.

Elías kiiljuik Acab amo tlaauetsiskia o amo tlakiyauiskia pampa ya kichiuayaya tlen amo kuali. Kipano eyi xiuitl amo tleno ixuak ipan milaj, uan maseualmej tlauel mayanayayaj. Teipa, Jehová sampa kititlanki Elías ma kiitati tlanauatijketl Acab. Acab kiiljuik Elías: “Ta san tijchiua ma tijpiakaj kuesoli”. Elías kinankilik: “Amo notlajtlakol yeka amo tlaauetstok. Tlaauaktok pampa ta tijueyichiua Baal. Xikinsentili nochi maseualmej uan nojkia Baal itlajtolpanextijkauaj ipan tepetl Carmelo. Nopaya tikitasej tlen panos”.

Nochi mosentilijkej ipan nopa tepetl, uan Elías kiniljuik: “Moneki inkitlapejpenisej tlen inkichiuasej. Tlaj Jehová yaya toTeotsij katli melauak, xijtokilikaj. Uan tlaj Baal yaya nopa teotsij tlen melauak, uajka ya xijtokilikaj. Nijneki ma tijchiuakaj se tlamantli. Ni 450 Baal itlajtolpanextijkauaj ma kichiuakaj se tlakajkaualistli uan ma kinojnotsakaj ininteotsij. Na nojkia nijchiuas se tlakajkaualistli uan nijnojnotsas Jehová. Katli kichiuas ma uetsi tlitl, yaya eli nopa toTeotsij katli melauak”. Nochi kiijtojkej kena kichiuaskiaj.

Baal itlajtolpanextijkauaj kichijkej nopa tlakajkaualistli. Se tonal kitsajtsilijtoyaj ininteotsij, kiiljuiyayaj: “¡Toteko Baal, xitechnankili!”. Uan Baal amo kinnankiliyaya. Elías kinpinajtiyaya uan kiniljuiyaya: “Chikauak xijtsajtsilikaj. Uelis kochtok uan moneki inkiixitisej”. Nechka tlatlayouaskia, uan maske Baal itlajtolpanextijkauaj miakpa kitsajtsilijkej ininteotsij, ya amo kinnankilik.

Uajka Elías kitlalik nopa tlakajkaualistli ipan tlaixpamitl uan iixko kitekilik miak atl. Teipa, kinojnotski Jehová uan kiiljuik: “Jehová, nochi ni maseualmej ma kiitakaj ta titoTeotsij katli melauak”. Jehová nimantsi kititlanki tlitl tlen iluikak uan kitlatik nopa tlakajkaualistli. Nochi maseualmej  chikauak kiijtojkej: “¡Jehová yaya toTeotsij katli melauak!”. Uajka Elías kiijtok: “Amo xijkauakaj ma mochololti niyon se Baal itlajtolpanextijka”. Ipan nopa tonali kinmiktijkej nopa 450 Baal itlajtolpanextijkauaj.

Teipa monextik se mixtli ipan ueyi atl, uan Elías kiiljuik Acab: “Namantsi chikauak tlaauetsis. Xijkualchijchiua mocarro uan xia mochaj”. Ipan iluikaktli nimantsi tlayayauixki, pejki tlaajaka uan chikauak pejki tlaauetsi. ¡Nama kena tlaeliskia! Acab nimantsi yajki ichaj ipan icarro. Jehová kipaleuik Elías ma motlalo tlauel chikauak uan ma kipano Acab icarro. ¿Timoiljuia Elías ayokmo kipiaskia kuesoli? Tikitasej tlen panok.