Itech tekiuajyot Israel kampa pouiaj 10 uejueyi kalyetouanij tekiuajtikej miakej akin amo yolkualmej katkaj, sayoj ke Acab yejua akin okachi amo yolkuali katka. Monamiktij iuan Jezabel, se siuat tel amo yolkuali akin kiueyichiuaya tiotsin Baal. Acab uan Jezabel kichiujkej maj tel miakej kiueyichiuanij Baal. No kinmiktijkej tel miakej itanauatijkauan Jiova. ¿Toni kichiuak Jiova? Kititanik tanauatijkej Elías maj kimatiltiti Acab se taman.

Elías kiluij Acab ke amo kiouiskia itech xolal Israel porin yejua katka se tekiuaj tel amo yolkuali. Amo moskaltij tein kitokkej panoua eyi xiuit, uan taltikpakneminij tel mayanayaj. Satepan, Jiova oksepa kititanik Elías maj kiitati Acab. Tekiuaj Acab kiluij Elías: “Tejua sayoj tikualkui kuejmolmej. Nochi nejin tejua motajtakol”. Elías kinankilij: “Amo notajtakol maj amo kioui. Tel tauaktok porin tejua tikueyichiua Baal. Xikinsentili israelitas uan itanauatijkauan Baal ikuapan tepet Carmelo. Maj tikchiuakan se taman tein kinextis akoni Dios akin melauak”.

Israelitas mosentilijkej itech tepet, uan ompa Elías kijtoj: “Moneki nankiixpejpenaskej. Komo Jiova yejua Dios akin melauak, xiktojtokakan. Sayoj ke komo Baal yejua dios akin melauak, xiktojtokakan yejua. Tikchiuatij se taman: 450 itanauatijkauan Baal moneki kitemakaskej se nemaktil uan kinotsaskej inintiotsin. Nejua no niktemakati se nemaktil uan niknotsati Jiova. Dios akin tanankilis uan kiualtitanis tit yejua Dios akin melauak”. Nochin kijtojkej ke kuali yetoya.

Ompa, itanauatijkauan Baal kitemakakej ininnemaktil. Kinotstoyaj inintiotsin nochi tonal: “¡Baal, xitechnankili!”. Sayoj ke kemej amo tanankiliaya, Elías kikejkeloj ijkon: “Xiknotsakan ika nochi nanmochikaualis. Xa kochtok uan moneki maj aksa kijxiti”. Tapoyauik, uan itanauatijkauan Baal kisentokayaj kinotstoyaj, sayoj ke amo akin kinnankiliaya.

Elías kitalij inemaktil itech se altar uan kipantekilij miak at. Ompa kitataujtij Dios: “Jiova, maj nochin kiitakan ke tejua tiDios akin melauak”. Jiova niman kiualtitanik tit uan kichichinoj nemaktil. Taltikpakneminij chikauak kijtojkej:  “¡Jiova yejua Dios akin melauak!”. Axkan Elías kijtoj: “Amo xikauakan maj cholo nion se itanauatijkauj Baal”. Itech nejon tonal, kinmiktijkej 450 itanauatijkauan Baal.

Satepan, nesik se mixtsin itech ueyiat, uan Elías kiluij Acab: “Tel chikauak kiouiti. Xikyektali mocarro uan xiyouj mochan”. Tel tatileuik, taejekaya uan peuak kioui tel chikauak. Ijkon tamik tonalmej keman tauaktoya. Acab kiteltsikuinaltij icarro. Sayoj ke Jiova kipaleuij Elías maj okachi ijsiujka motalouani ke icarro Acab. ¿Kijtosneki nejin ke tankajya nochi ikuejmoluan Elías? Maj tikitakan.