Uejueyij tekiuajkej amo yolkualmej okinnauatijkej majtlaktli tlanechikolmej itech Israel, pero Acab okatka okachi amo yolkuali. Ye omonamikti iuan se siuatl amo yolkuali tlen omotokayotiaya Jezabel. Nin siuatl okiueyichiuaya dios Baal. Acab uan Jezabel okinchiualtijkej miakej ma kiueyichiuakan Baal. Noijki okinmiktijkej miakej teotlajtojkej. ¿Tlen okichi Jehová? Okititlanki teotlajtojki Elías ma motlapouiti iuan Acab.

Elías okilui Acab ayakmo kiauiskia itech altepetl Israel porque okatka amo yolkuali. Kanaj eyi xiuitl amo itlaj otlakiaya uan otlaapistik. Satepan, Jehová oksepa okititlanki Elías kanin okatka Acab. Ueyi tekiua Acab okilui Elías: “Te san tikchiua ma yeto ouijkayotl, motlajtlakol nochi tlen panotok”. Elías okinankili: “Amo notlajtlakol amo kiaui. Ijkon panoa porque tikueyichiua Baal. Xikinnechiko nochtin itech tepetl Carmelo, noijki teotlajtojkej tlen kiueyichiuaj Baal. Ompa tikitaskej akin melauak toTajtsin Dios”.

Nochtin omonechikojkej itech tepetl uan Elías okinmilui: “Xikpejpenakan. Tla Jehová melauak toTajtsin Dios, ye xiktekichiuilikan. Pero tla Baal melauak dios, ye xiktekichiuilikan. Tikchiuaskej nin tlamantli: 450 teotlajtojkej tlen kiueyichiuaj Baal kitlaliskej se tlamanali uan kinotsaskej Baal. Uan ne noijki niktlalis se tlamanali uan niknotsas Jehová. Akin kiualtitlanis tlitl, ye melauak toTajtsin Dios”. Yejuan okijtojkej ijkon kichiuaskiaj.

Teotlajtojkej tlen okiueyichiuayaj Baal okitlalijkej intlamanal. Uan nochi tonal okinotskej Baal, okijtoayaj: “¡Oh Baal, xitechnankili!”. Pero Baal amo okinnankiliaya, ik non, Elías okipinaui Baal uan okijto: “Chikauak xiknotsakan, xamo kochtok uan moneki ma kixitikan”. Okinotskej Baal hasta ijkuak yitlayoatoka, pero amo okinnankili.

Elías okitlali itlamanal ipan se altar uan okinokili miak atl. Satepan okijto: “Oh Jehová, nochtin ma kitakan te  melauak toTajtsin Dios”. San niman, Jehová okiualtitlanki tlitl uan okitlati tlamanali. Nochtin chikauak okijtojkej: “¡Jehová melauak toTajtsin Dios!”. Satepan, Elías okijto: “Amo xikkauilikan ma cholo nion se teotlajtojki tlen kiueyichiua Baal”. Non tonal okinmiktijkej 450 teotlajtojkej tlen okiueyichiuayaj Baal.

Satepan, omotaya se mixtli ipan ueyi atl uan Elías okilui Acab: “Chikauak kiauis. Xitlejko ipan mocarreta uan xio mokalijtik”. Opejki tlamixtlayoa, chikauak oejekak uan chikauak okiauik. Ijkon oksepa okipixkej atl. Acab otlejkok ipan icarreta uan totoka oyajki. Jehová okipaleui Elías para okachi totoka ma motlalo. Pero ¿ayakmo kipiaskia ouijkayotl Elías? Ma tikitakan okse tlamachtil.