Umambo wo 10 ro majinja o Iziraeri wakatongwa ngo majimambo akashata maningi, asi Akhabhi waishatisisa maningi. Iyena wakacadha no mwanakaji wakashata maningi wainamata Bhaari. Zina rake rainga Jezabheri. Akhabhi pomwe na Jezabheri vakaita kuti vandhu vakawanda vo munyika vanamate Bhaari zve vakauraya maporofita a Jehovha. Jehovha wakaitenyi? Wakatumira muporofita Eria kuti aende koopekeja masoko Akhabhi.

Eria wakabvunja Mambo Akhabhi kuti akucaizona nvura ku Iziraeri ngo ndava yo ushati wovaita. Ku makore anokwana matatu, apana zvirimwa zvakamera zve vandhu vakagara no njara. Jehovha wakazotumazve Eria kuti ahwirire kuna Akhabhi. Mambo anoti: ‘Iwewe ndiwe khombo rakona! Ndiwe uri kuitisa zvese izvi.’ Eria anopingura eciti: ‘Andizivi kuitisa zvineso izvi. Ndimwi mazviitisa ngo kuti makasia Mwari monamata Bhaari. Waro ngatiejei tivone kuti ndiyani Mwari okadi-kadi. Unganijai vandhu pomwe no vaporofita va Bhaari pamusoro po dundhu Karimero.’

Vandhu vakaungana pa dundhu. Eria wakati: ‘Sananyi kuti munoda kwapi. Kudari Jehovha ndi Mwari wokadi-kadi, muteverenyi. Kudari ndi Bhaari, teveranyi iyena. Ngatiitenyi izvi. Vaporofita vanokwana kuita 450 va Bhaari ngavagajirire kuti vape cibairo cavo zve ngavadanijire mwari wavo, zve inini ndicanasiriravo kuti ndipe cibairo cangu zve ndodanija Jehovha. Mwari anodavira ngo muriro ndiyena Mwari wokadi-kadi.’ Vandhu vese vakatendera.

Vaporofita va Bhaari vakanasirira kuti vape cibairo cavo. Vakapeja zuva rese vacikhuwira mwari wavo veciti: ‘Bhaari tipingurei!’ Eria paakavona kuti Bhaari aazivi kuvapingura wakavaitira jee. Iyena wakati: ‘Khuwisisanyi mbhera pamunokwanisa. Pamwe wakavata zve anoda kumuswa ngo mundhu.’ Vaporofita vo Bhaari vakaramba vecikhuwa mbhera masikati. Apana wakapingura.

Eria wakadira cibairo cake pa dandiro zve wakacidururija kumwa. Perapo wakakumbira eciti: ‘Jehovha, ndapota itanyi kuti vandhu vese vazive kuti imwimwi ndimwi Mwari wokadi-kadi.’ Ngo kukasika Jehovha wakatumira muriro kubva kudenga wakapisa cibairo cake. Vandhu vakatanga kumima veciti: ‘Jehovha ndi Mwari wokadi-kadi!’ Eria wakati: ‘Mucasia vaporofita  va Bhaari vatize!’ Njiku yondhoyo, vaporofita va Bhaari vanokwana kuita 450 vakaurawa.

Mu gore makatanga kuvoneka makwiti, Eria wakabvunja Akhabhi kuti: ‘Kuri kuviya nvura zinji. Pakirai ngoro jako zve endai kanyi.’ Denga rakasvipa ngo makore, mbhepo rakabvuta zve kwakatanga kuna nvura. Ku Iziraeri kwakava no nvura. Akhabhi wakagogomesa ngoro yake. Eria ecibesehwa ndi Jehovha wakagogoma kupindirija ngoro ja Akhabhi! Waro kureva kuti zvineso zvese zva Eria zvainga zvapera here? Ngativonenyi.