Omazimo omulongo guukwaniilwa waIsraeli oga li ge na aakwaniilwa oyendji aawinayi, ihe omukwaniilwa Ahab okwa li omwiinayi unene kuyo ayehe. Okwa li a hokana omukulukadhi omukolokoshi, ngoka ha galikana oshikalunga Baal. Edhina lye oIsebel. Ahab naIsebel oya li ya nwetha mo aantu ayehe moshilongo ya longele Baal, noya dhipaga aapolofeti yaJehova. Jehova okwa ningi po shike? Okwa tumu omupolofeti Elia a gandje etumwalaka kuAhab.

Elia okwa lombwele omukwaniilwa Ahab kutya omolwuuwinayi we, muIsraeli itamu ka lokwa. Uule womimvo dhi vulithe pundatu evi itali ka mena sha, naantu otaya ka sa ondjala. Konima Jehova okwa tumu ishewe Elia kuAhab. Omukwaniilwa Ahab okwa ti: ‘Ongoye we etitha uupyakadhi mbuka! Epuko olyoye.’ Elia okwa yamukula a ti: ‘Hangaye nde etitha oshikukuta shika. Ongoye, sho ho galikana oshikalunga Baal. Otatu ka tala kutya olye e wu etitha. Gongela oshigwana naapolofeti yaBaal kondungu yondundu Karmel.’

Aantu oya gongala kondundu. Elia okwa ti: ‘Hogololeni, Jehova ngele oye Kalunga kashili, mu longeleni. Ngele oBaal, mu longeleni. Natu taleni nduno kutya Kalunga kashili ogunipo. Aapolofeti yaBaal 450 nayi ilongekidhe okuyamba e tayi ithana kalunga kawo. Ngame otandi ka longekidha eyambo e tandi ithana Kalunga kandje, Jehova. Ngoka ta yamukula nomulilo oye Kalunga kashili.’ Aantu oye shi zimine.

Aapolofeti yaBaal oya longekidha eyambo lyawo. Esiku alihe oyi ithana kalunga kawo taya ti: ‘Baal, tu zimina!’ Sho Baal inee ya yamukula, Elia okwe ya nyenkele ta ti: ‘Galikaneni mokule. Otashi vulika a kotha, mu pendutheni owala.’ Aapolofeti yaBaal oya tsikile okugalikana sigo opokati komutenya, ihe inaku uvika nando eyamukulo.

Elia okwa tula eyambo lye koshiyambelo e te li tile omeya. Okwa galikana ta ti: ‘Jehova yamukula ndje, opo aantu ya tseye kutya ongoye Kalunga kashili.’ Mbalambala Jehova okwa tumu omulilo okuza megulu e tagu lungunitha po eyambo. Aantu oyi igidha ya ti: ‘Jehova oye Kalunga kashili!’ Elia okwa ti: ‘Inamu etha nando aapolofeti yaBaal ya fadhuke  po.’ Esiku ndyoka aapolofeti 450 yaBaal oya dhipagwa.

Sho okakogo okashona ka anduka mefuta, Elia okwa lombwele Ahab a ti: ‘Oshihomo shomvula oshe ya. Kutila etemba lyoye wu ye kegumbo.’ Egulu olya tameke okuluudha iikogo, ombepo oya tameke okupepa nomvula onene oya tameke okuloka. Lwahugunina, ondjala oya hulu. Ahab okwa matukitha etemba lye ngaashi ta vulu. Kekwatho lyaJehova, Elia okwa matuka ondapo onene e ta thigi po etemba lyaAhab. Mbela uupyakadhi waElia opo owala wa hulile mpono? Natu shi taleni.