Omwene wa mahimo khumi a Isarayeli waakhalano mamwene mancipale ootakhala, nto Akape taatempe okhala mwene ootakhala. Aamuthela muthiyana awuuma murima aamulapela Pala. Nsina nawe naari Yesapeli. Akape ni Yesapeli yaasareiha elapo ni malapelo a Pala nave yaawiipha alapeli a Yehova. Tiheeni Yehova enreiye? Owo aamuruma mulipa a miririmu Eliya wi amuleele Akape michaka.

Eliya aamuleela Akape wi o Isarayeli yaahaala okhalawo elimwi nthowa na weera soonanara. Soolya hisaamela nave achu yaanakhwa etala mu iyaakha sawaakhwana raru. Vaavaa Yehova aamurummeiye Eliya wi aye wa Akape ekwaha yanaawiili, Akape aaloca: ‘Ti weyaano otannyile epahu yoothene ya Isarayeli.’ Eliya aahaakhula: ‘Tahi yoomi, nto ti nyuwaano mutannyile ntakhara moowepesa amuluku a Pala. Vano mukithukumanyerye achu oothene a Isarayeli va Mwaako Karmelo nave mwaawope alipa a miririmu a muluku Pala.’

Achu yaathukumana o Mwaako Karmelo. Eliya aahaakoha: ‘Munaya ohiya liini okhala anamphara piili? Yehova aari Muluku, mmuchareke yoowo; nto Muluku aari Pala, mmuchareke yoowo. Alipa a miririmu a Pala ereherye mukucho aya nave emvekele muluku aya, nave miyo kinahaala oreherya mukucho aka nave kinahaala omvekela Yehova. Muluku eeparipari oni akhale yoole onahaala waakhula arumihaka mooro.’ Achu oothene yaaheemererya.

Alapeli a Pala yaareherya mukucho aya. Yaamaliha nihiku noothene emvekelaka muluku aya eriki: ‘Pala onaakhule!’ Vaavaa Pala aahaakhunleiye, Eliya aapacerya waaroha ariki: ‘Mukhuweleke vatokovene, ntakhara Pala ti muluku! Akhweya ooweiwa, naari onamurupa, mumviihe.’ Nsuwa naaneela, nave alipa a miririmu a Pala yaatitelela okhuwela evekelaka, nyenya hiyaakhuliwe.

Vanonto Eliya aareherya mukucho awe nave aahelavo maahi mancipale. Voocharela aavekela: ‘Pwiya Yehova, mukiwiriyane! Hiiha achu ala anamusuwela wi nyuwaano pahi muri Muluku eeparipari.’ Mwawaakuveya Yehova aavonya mooro wirimu nave waaheeyela mukucho wa Eliya.  Vano achu oothene yaakhuwela: ‘Yehova ti Muluku eeparipari!’ Eliya aahi: ‘Mwaaphare alipa a miririmu awo a Pala! Ahikhale ani akophole!’ Nihiku nenle yaahiiphiwa alipa a miririmu a Pala 450.

Vaavaa neeku nikhaani noonen’yaaya ophareya, Eliya aahi wa Akape: “Hawe walye ni wawurye, ntakhara onniiweya oruma wa epula.” Erimu yaasareya meeku ooripa, echeku yaapacerya woopa, nave yaarupa epula etokweene. Mwawiihiiha, elimwi yaamala. Vanonto Akape aaheeciha ekaaro awe ni waakuva. Nnikhaviheryo na Yehova, Eliya aachimaka opwaha ekaaro ya Akape! Apwanne makacamiho a Eliya yaamala? Hanko noone.